चीनको सैन्य दबाब र ट्रम्पको ‘आउट अफ द बक्स’ शैली

अमेरिकाका लागि ताइवानका कूटनीतिक प्रतिनिधि अलेक्ज्याण्डर युईले अमेरिकी नागरिकलाई आफ्नो देशको भूराजनीतिक संकट बुझाउन पश्चिमी पप संस्कृतिका विविध सन्दर्भहरू प्रयोग गरेका छन्। अमेरिकी राष्ट्रपति डोनाल्ड ट्रम्प र ताइवानी राष्ट्रपति लाइ चिङ-तेबीच सम्भावित सिधा फोन वार्ता कूटनीतिक रूपमा न्यायसंगत हुने उनले बताए। ट्रम्पले १४ अर्ब डलरको हतियार सम्झौतासँग चीनसँगको सौदाबाजीको माध्यम बनाए पनि ताइवान अमेरिकी संसद्को बलियो समर्थनप्रति विश्वस्त रहेको उनले उल्लेख गरे।

वासिङ्टन डीसीमा युई यसै बेला राजनीतिक वृत्तमा व्यस्त छन्। ट्रम्पले ताइवानलाई १४ अर्ब डलरको हतियार बिक्री गर्ने विषयलाई चीनसँगको सम्झौतामा ‘नेगोसिएटिंग चिप’ को माध्यम बनाउन सक्ने संकेत गरेपछि युई ताइवानको सुरक्षा संवेदनशीलता रक्षाका लागि अग्रपंक्तिमा उभिएका छन्। अमेरिकी प्रशासन बेइजिङको दबाबमा नझुक्न र ताइवानप्रतिको प्रतिबद्धताबाट पछि नहट्न सुनिश्चित गर्नु नै अहिले उनको मुख्य चुनौती बनेको छ।

युईले आफ्नो कार्यकालको धेरै समय पर्दापछाडि रहेर दुवै अमेरिकी राजनीतिक दलको समर्थन जुटाउन खर्च गरेका थिए। तर, गत महिना ट्रम्प र चिनियाँ राष्ट्रपति सी चिनपिङबीच भएको द्विपक्षीय शिखर वार्तापछि युईको भूमिका एकाएक फेरिएको छ। उनले ताइवानको बलियो वकालत गर्न सार्वजनिक मञ्चहरूमा देखिन थालेका छन्। उनले ताइवानलाई हतियार बिक्री गर्नु अमेरिकाका लागि कुनै बोझ नभई बुद्धिमानीपूर्ण लगानी भएको तर्क प्रस्तुत गरेका छन्।

युईले अमेरिकी जनतासँग संवाद गर्न हलिउड र पश्चिमी पप संस्कृतिका सन्दर्भहरू प्रयोग गरेका छन्। उनले ताइवानको जटिल अन्तर्राष्ट्रिय स्थितिलाई चर्चित उपन्यास ‘ह्यारी पोटर’ को जादुई विद्यालय ‘हगवर्ट्स’ सँग तुलना गरेका छन्। यद्यपि, वर्तमान समयमा विश्वका धेरै मानिसले ताइवानको भूगोल र लोकतान्त्रिक चरित्रलाई राम्रोसँग बुझ्न थालेकोमा उनी सकारात्मक देखिन्छन्। ट्रम्पले ताइवानका मामिलामा दशकौंदेखि चल्दै आएको कूटनीतिक मर्यादा र स्थापित परम्पराहरूलाई खासै वास्ता नगरेको इतिहास छ। यदि ट्रम्प र ताइवानका राष्ट्रपतिबीच फोन वार्ता भयो भने त्यो इतिहासकै ठूलो घटना हुनेछ।