अमेरिकी उपराष्ट्रपतिले भने– इरानलाई विश्व अर्थतन्त्रमा फर्काउने बाटो खोल्न तयार

३ असार, काठमाडौं । अमेरिकाका उपराष्ट्रपति जेडी भान्सले आफ्ना सबै दायित्वहरू इमान्दारीपूर्वक पूरा गरे अमेरिका इरानलाई पुनः विश्व अर्थतन्त्रमा फर्काउने बाटो खोल्न तयार रहेको बताएका छन्। प्रारम्भिक समझदारीका प्रावधानबारे बोल्दै उनले इरानलाई पुनः विश्व अर्थतन्त्रमा फर्काउने बाटो खोल्न तयार रहेको बताएका हुन्।

‘फक्स न्युज’ को एक कार्यक्रममा उपराष्ट्रपति भान्सले इरानका साथ ट्रम्प प्रशासनको सम्झौताको तुलना पूर्वराष्ट्रपति बराक ओबामाको शासनमा भएको सम्झौतासँग गरे। ओबामाको शासनकालमा इरानसँग भएको सम्झौता नराम्रोसँग असफल भएको र अहिलेको सम्झौता त्योभन्दा बिल्कुलै विपरित रहेको उनको भनाइ छ। ‘ओबामाको पालाको सम्झौता र अहिलेको सम्झौताबीचको मुख्य फरक भनेको यसअन्तर्गत इरानले परमाणु हतियार बनाउन सक्दैन,’ अमेरिकी उपराष्ट्रपति भान्सले भने, ‘युरेनियम संवद्र्धन गर्न सक्दैन र त्यसको भण्डारणसमेत गर्न सक्दैन।’

सम्झौताअनुसार इरानले परमाणु हतियार बनाउन नपाउने, होर्मुज स्ट्रेट खुला रहने र इरानले जिम्मेवारीपूर्ण व्यवहार गरे विभिन्न प्रकारका लाभ प्राप्त गर्न सक्ने उनले बताए। ‘यदि उसले सम्झौताका सर्तहरू पालना गरेन भने कुनै लाभ पाउने छैन,’ भान्सले भने। भान्सले शुक्रबार स्वीट्जरल्यान्डमा इरानसँग युद्ध अन्त्यसम्बन्धी सम्झौतामा हस्ताक्षर गर्ने कार्यक्रम रहेको पनि जानकारी दिए।