जुन १८ गतेको साँझ एटलान्टामा मैदानको बीचभागमा उभिएका टोरी पेन्सो, ब्रुक मेयो र क्याथ्रिन नेस्बिटको नाम विश्व फुटबलले धेरै वर्षसम्म सम्झिरहनेछ। किनभने त्यस दिन उनीहरूले केवल खेल सञ्चालन गरेनन्, सम्भावनाको नयाँ युग पनि प्रारम्भ गरे।
अटलान्टा स्टेडियममा दक्षिण अफ्रिका र चेक गणतन्त्रबीचको खेल सञ्चालन गर्दै तीन महिला रेफ्रीहरूले पुरुष विश्वकपमा इतिहास रचेका छन्। मुख्य रेफ्री टोरी पेन्सो फ्रान्सकी स्टेफानी फ्रापार्टपछि पुरुष विश्वकपमा खेल सञ्चालन गर्ने दोस्रो महिला बनेकी छन्। सहायक रेफ्रीहरू ब्रुक मेयो र क्याथ्रिन नेस्बिटसहितको टोलीले सञ्चालन गरेको उक्त खेल १–१ को बराबरीमा समाप्त भयो।
बिहीबार, जुन १८। समूह ए अन्तर्गतको खेल सुरु हुन केही मिनेट मात्र बाँकी थियो। स्टेडियमका हजारौं दर्शकले नजर मैदानमा दिएका थिए। चेक गणतन्त्र र दक्षिण अफ्रिकाका खेलाडीहरू टनेलबाट बाहिर निस्कन तयारीमा थिए। राष्ट्रगान बज्नुअघि मैदानको माहौल क्रमशः रोमाञ्चक हुँदै गइरहेको थियो। विश्वकपको अर्को महत्वपूर्ण खेल सुरु हुन लागेको उत्साहले वातावरण भरी रमाइलो प्रकाश फैलाएको थियो।
त्यस दिन दर्शक, सञ्चारमाध्यम र फुटबल समर्थकहरूको ध्यान केही क्षणका लागि खेलाडीहरूबाट हटेर मैदानको बीचभागतिर गयो। कारण थियो, त्यहाँ हातमा सिठी लिएर उभिएका तीन महिला। मुख्य रेफ्री टोरी पेन्सो र उनका सहायकहरू ब्रुक मेयो तथा क्याथ्रिन नेस्बिट खेल सञ्चालनका लागि मैदानमा प्रवेश गरेका थिए। सामान्यतया रेफ्रीको आगमन ठूलो समाचार हुँदैन। तर त्यस दिन परिस्थिति बिल्कुल फरक थियो।
