विश्व बुद्धिचाल महासंघद्वारा आयोजना हुने ४६औँ चेस ओलम्पियाडका लागि नेपाल बुद्धिचाल महासंघले पूर्वनिर्धारित अनुसार पुरुष र महिलातर्फ गरी ५-५ जना खेलाडी छानिसकेको छ। झापाको दमकमा सम्पन्न राष्ट्रिय बुद्धिचाल प्रतियोगितामा खुल्ला तर्फ रुपेश जैसवाल र महिलातर्फ कृतिसरा अधिकारीले उपाधि जितेका हुन्। यस प्रतियोगिताबाट चालु वर्ष सेप्टेम्बरमा उज्बेकिस्तानमा आयोजना हुन लागेको ४६औँ चेस ओलम्पियाडका लागि नेपालबाट १० जना खेलाडी छनोट गरिएको छ।
खुल्ला तर्फका विजेता रुपेशले ११ खेलबाट ९.५ अंक र महिलातर्फकी विजेता कृतिसराले ८.५ अंक प्राप्त गर्दै उपाधि जितेका हुन्। ५ असार, दमकस्थित होटल कामाक्षमा सम्पन्न २६औँ खुल्ला र ११औँ महिला राष्ट्रिय बुद्धिचाल प्रतियोगितामा एफएम रुपेश जैसवाल र कृतिसरा अधिकारी विजेता बनेका हुन्। प्रदेश खेलकुद विकास बोर्ड, कोशी प्रदेश तथा जिल्ला बुद्धिचाल संघ झापाको सहकार्यमा आयोजन हुन सफल उक्त प्रतियोगितामा नेपाल बुद्धिचाल महासंघले व्यवस्थापन गरेको थियो।
प्रतिस्पर्धाको खुल्ला तर्फ रौतहटका एफएम रुपेश जैसवालले ११ खेलबाट ९.५ अंक जोड्दै उपाधि रक्षा गरेका छन्। योसँगै तेस्रो पटक राष्ट्रिय विजेता बनेका रुपेशले अन्तिम खेलमा सिएम सुश्रुत दहालसँग समानता बनाए। दोलखाका युवा आशिष फुयालले ७.५ अंकसहित दोस्रो र पूर्व नेपाल च्याम्पियन राजन सुबेदीले ७ अंकसहित तेस्रो स्थान हासिल गरेका छन्। समान ७ अंकका आधारमा टाइब्रेक प्रयोग गर्दा झापाकी सिएम सुश्रुत दहाल चौथो, काठमाडौंका सिएम पुरुषोत्तम सिलवाल पाँचौं र पाँचथरका रिशोन थापा छैटौं स्थानमा रहेका छन्।
महिलातर्फ झापाकी कृतिसरा अधिकारीले उत्कृष्ट प्रदर्शन गर्दै ८.५ अंकसहित राष्ट्रिय महिला च्याम्पियनको उपाधि हात पारिन्। झापाकी पूजा भण्डारी ७.५ अंकसहित दोस्रो र दोलखाकी निहाना श्रेष्ठ ७ अंकसहित तेस्रो स्थानमा रहेकी छन्। समान ७ अंककी एन्जल महर्जन टाइब्रेकका आधारमा चौथो स्थानमा छिन्। डाइरेक्ट इन्काउण्टर तथा सोन्नेवार्ग बर्जर टाइब्रेकमार्फत समान ६.५ अंक हासिल गरेका काठमाडौंकी बिनिता कपाली, निवर्तमान ओमन नेपाल च्याम्पियन सिन्दिरा जोशी र झापाकी प्रिया क्षेत्री क्रमशः छैटौं स्थानमा छन्।
विश्व बुद्धिचाल महासंघद्वारा आयोजना हुने ४६औँ चेस ओलम्पियाडमा पुरुषतर्फ एफएम रुपेश जैसवाल, आशिष फुयाल, राजन सुवेदी, सिएम सुश्रुत दहाल र सिएम पुरुषोत्तम सिलवाल छनोट भएका छन् भने महिलातर्फ पूर्व विजेता सिन्दिरा जोशी, कृतिसरा अधिकारी, पूजा भण्डारी, निहाना श्रेष्ठ र एन्जल महर्जन चयन भएका छन् भन्ने जानकारी महासंघका सदस्य राजु ताम्राकारले दिएका छन्।
