जुम्लामा आर्थिक वर्ष २०८१/८२ मा तीन हजार ६७१ मेट्रिकटन सिमी उत्पादन भएको छ। कृषि विकास कार्यालय जुम्लाका प्रमुख रामभक्त अधिकारीका अनुसार, यस सिमी बिक्रीबाट रु एक करोड ३३ लाख ९२ हजार आम्दानी भएको छ। जिल्लामा दुई हजार २५७ हेक्टर क्षेत्रफलमा सिमी उत्पादन भइरहेको छ। बजारमा माग बढेसँगै किसानहरू सिमीखेतीतर्फ आकर्षित भएका छन्।
तर, सिमीको उचित बजार व्यवस्थापन र मूल्य निर्धारणमा एकरूपता नहुँदा किसानहरूले प्रतिकेजी १५० रुपैयाँमा सिमी बिक्री गर्न बाध्य छन्। तिला गाउँपालिका, तातोपानी, चन्दननाथ, कनकासुन्दरी, पातरासी, हिमा, तातोपानी र गुठीचौर क्षेत्रका किसानहरूले सिमीखेतीबाट राम्रो आम्दानी हासिल गरेका छन्। तिलाको रारागाउँका किसानहरूले गत वर्ष न्यूनतम तीनदेखि १२ क्विन्टलसम्म सिमी उत्पादन गरेका छन्।
सिमी क्षेत्र भनेर राष्ट्रिय कृषि आधुनिकीकरण कार्यक्रम कार्यान्वयन एकाइ जुम्लाले तिला–१ रारामा सिमी जोन कार्यक्रम लागू गरेको छ। उक्त पालिको वडा नं १ सहित २, ८ र ९ वडामा आठ सय हेक्टर क्षेत्रफलमा सिमीको व्यावसायिक उत्पादन तथा प्रशोधन केन्द्र विकास गर्न सिमी जोन कार्यक्रम सञ्चालन गरिएको छ। किसानहरूले उन्नत बीउ, प्राविधिक सहयोग र व्यावसायिक खेतीसम्बन्धी तालिम प्राप्त गर्दै आएका छन्।
सम्बन्धित खबर
