सोमबार बिहान सम्पन्न खेलमा इजिप्टले न्यूजिल्यान्डलाई ३–१ ले पराजित गर्दै समूहको शीर्ष स्थानमा उक्लिएको छ। फिफा विश्वकप २०२६ अन्तर्गत समूह ‘जी’ मा इजिप्टले शीर्ष स्थान हासिल गरेकोले नकआउट चरण प्रवेशको सम्भावना बलियो भएको छ। न्यूजिल्यान्डका फिन सम्र्यानले सुरुवाती गोल गरे पनि इजिप्टका मोस्तफा जिको, मोहम्मद सलाह र ट्रेजेग्वेटले गोल गर्दै टोलीलाई जित दिलाएका थिए। यस जितसँगै इजिप्टले २ खेलबाट ४ अंक जोडेको छ।
खेलमा पहिलो अग्रता न्यूजिल्यान्डले लिएको थियो। खेलको १५औं मिनेटमा फिन सम्र्यानले गोल गर्दै टोलीलाई अग्रता दिलाएका थिए। तर त्यस अग्रता जोगाउन नसक्दा न्यूजिल्यान्ड पराजित हुन पुग्यो। खेलको ५८औं मिनेटमा मोस्तफा जिकोले गोल गर्दै खेल बराबरीमा ल्याए। त्यसको ९ मिनेटपछि इजिप्टका कप्तान मोहम्मद सलाहले गोल गर्दै आफ्नो टोलीलाई अग्रता दिलाए। ८२औं मिनेटमा ट्रेजेग्वेटले गोल गरेर अग्रताको दूरी बढाए। बल पोजिसनदेखि सर्टसम्म इजिप्टले खेलमा दबाब कायम राख्यो। यस जितसँगै इजिप्ट समूह ‘जी’ मा शीर्ष स्थानमा उक्लिएको छ भने इरान र बेल्जियम समान २ अंकमा छन्। न्यूजिल्यान्डले एक अंक मात्र जोडेको छ।
