बेलायतका प्रधानमन्त्री कीर स्टार्मरले पार्टीभित्रको बढ्दो दबावका कारण सोमबार आफ्नो पदबाट राजीनामा दिने घोषणा गरेका छन्। देशवासीलाई सम्बोधन गर्दै उनले भने, “मैले सधैँ आफूले माया गर्ने देशलाई पहिलो प्राथमिकतामा राखेर निर्णय लिएको छु।” लेबर पार्टीले नयाँ नेता चयन नगरेसम्म उनी कार्यवाहक प्रधानमन्त्री रहनेछन् भने नयाँ नेतृत्व चयनको प्रक्रिया ९ जुलाईदेखि शुरू हुनेछ।
स्टार्मरले सोमबार विहान राजा चार्ल्सलाई भेटेर आफ्नो राजीनामा सम्बन्धी जानकारी गराइसकेका छन्। उनले भने, “मेरो पार्टीले आगामी चुनावमा नेतृत्व गर्न मलाई उपयुक्त देख्छ कि होइन भनेर प्रश्न गरिरहेको छ, र म त्यसको जवाफ स्वीकार गर्छु।” उनले थपे, “जब म देशको यो सबैभन्दा ठूलो जिम्मेवारी (पद) छाड्नेछु, म मेरो जीवनको सबैभन्दा महत्त्वपूर्ण जिम्मेवारी- एक असल श्रीमान् र बुबा बन्नमा बढी समय दिनेछु।”
स्टार्मरको लोकप्रियता पछिल्लो समय घट्दै गएको थियो। गत साता भएको विशेष उपनिर्वाचनमा उनका आन्तरिक प्रतिद्वन्द्वी एन्डी बर्नहमको ठुलो जितपछि उनलाई राजीनामा दिन दबाव तीव्र बनेको थियो। बर्नहम लेबर पार्टीको नेतृत्व सम्हाल्ने र भावी प्रधानमन्त्री बन्ने दौडमा अग्रणी छन्।
स्टार्मरले राजीनामाको घोषणा गर्दै पार्टीले नयाँ नेतृत्व चयनको समयसीमा पनि सार्वजनिक गरेका छन्। यस अनुसार, जुलाई ९ देखि उम्मेदवारी दर्ता खुल्नेछ। यदि एन्डी बर्नहमको विरुद्धमा कोही उम्मेदवार नउठे भने उनी जुलाईको मध्यमै बेलायतको नयाँ प्रधानमन्त्री बन्नेछन्।
सम्बन्धित खबर
