काठमाडौं उपत्यका बाहिर जाने यात्रुहरूलाई असुविधा र हैरानी दिने आरोपमा ट्राफिक प्रहरीले कोटेश्वर र जडीबुटी क्षेत्रमा १० जनालाई पक्राउ गरेको छ। पक्राउ परेका बस काउन्टर कर्मचारी, चालक र सहचालकहरूले यात्रुलाई तानातान गर्ने र झोला खोस्ने जस्ता अनुशासनहीन कार्य गरेको ट्राफिक प्रहरीले जनाएको छ। ट्राफिक प्रहरी प्रवक्ता नरेशराज सुवेदीका अनुसार, पक्राउ परेका सबैलाई आवश्यक अनुसन्धान र कानुनी कारबाहीका लागि जिल्ला प्रहरी परिसर काठमाडौं पठाइएको छ।
८ असार, काठमाडौं। ट्राफिक प्रहरीले काठमाडौं उपत्यकाबाट बाहिरिने यात्रुलाई अनावश्यक दुःख र हैरानी दिएको आरोपमा १० जनालाई पक्राउ गरेको हो। काठमाडौं उपत्यका ट्राफिक प्रहरी कार्यालयबाट खटिएको टोलीले कोटेश्वर र जडीबुटी क्षेत्रका बस काउन्टरका कर्मचारी, चालक र सहचालकलाई नियन्त्रणमा लिएको हो। पक्राउ पर्नेमा धनुषाका ४० वर्षीय सूर्यबहादुर देवकोटा, दोलखाका ३२ वर्षीय प्रकाश शिवाकोटी, भक्तपुरका ५५ वर्षीय हरिभजन थापा, दोलखाका ३८ वर्षीय डिल्लीप्रसाद लामिछाने, र सिन्धुपाल्चोकका २८ वर्षीय सुरेश तामाङ रहेका छन्।
त्यसैगरी, सिन्धुलीका २७ वर्षीय तिलककुमार थापा, दोलखाका २६ वर्षीय खड्कबहादुर तामाङ, सिन्धुलीका ३६ वर्षीय डोरकुमार श्रेष्ठ, ओखलढुंगाका ४५ वर्षीय नन्दलाल बुढाथोकी र सिन्धुपाल्चोकका ३६ वर्षीय राजेश सापकोटालाई पनि प्रहरीले नियन्त्रणमा लिएको छ। यात्रुलाई तानातान गर्ने र झोला खोस्ने जस्ता अमर्यादित कार्य गरेको आरोपमा उनीहरुलाई पक्राउ गरिएको र सबैलाई आवश्यक अनुसन्धान तथा थप कानुनी कारबाहीका लागि जिल्ला प्रहरी परिसर काठमाडौं पठाइएको ट्राफिक प्रहरी प्रवक्ता नरेशराज सुवेदीले जानकारी दिएका छन्।
