यूएईले १५ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध लगाउने निर्णय गर्यो

संयुक्त अरब इमिरेट्स (यूएई) सरकारले १५ वर्षमुनिका बालबालिकालाई सामाजिक सञ्जालमा प्रवेश गर्न प्रतिबन्ध लगाउने निर्णय गरेको छ। सामाजिक सञ्जाल कम्पनीहरूलाई आफ्ना प्रणाली सुधार गर्न १२ महिना दिइएको छ, यदि उनीहरूले समयमै सुधार नगरे प्रतिबन्धको सामना गर्नुपर्नेछ। अब प्लेटफर्महरूले बायोमेट्रिक वा कृत्रिम बुद्धिमत्ता मार्फत प्रयोगकर्ताको उमेर प्रमाणित गर्नुपर्नेछ र १५ वर्षमुनिकाहरूले सञ्चालन गरेका खाताहरू निष्क्रिय गर्नुपर्नेछ।

८ असार, काठमाडौं। यूएई सरकारले १५ वर्षमुनिका बालबालिकालाई सामाजिक सञ्जाल प्रयोगमा प्रतिबन्ध लगाउने निर्णय गरेपछि, टिकटक, इन्स्टाग्राम, स्न्यापच्याट, फेसबुक र एक्स (ट्विटर) लाई प्रणाली सुधार गर्न १२ महिनाको समय दिएको छ। तोकिएको मापदण्ड पूरा नगरेमा ती प्लेटफर्महरूलाई प्रशासनिक कारबाही र आंशिक वा पूर्ण प्रतिबन्धको सामना गर्नुपर्नेछ। यसअघि क्यानडा, फ्रान्स, चेक रिपब्लिक, अस्ट्रेलिया, मलेसिया लगायतका देशहरूले पनि बालबालिकालाई सामाजिक सञ्जालमा प्रवेशमा रोक लगाइसकेका छन्।

यूएई मन्त्रिपरिषद्को हालैको निर्णयले सामाजिक सञ्जाल कम्पनीहरूलाई बालबालिकाको उमेर प्रमाणित गर्ने व्यवस्था, लक्षित विज्ञापन रोक्ने र बाल सुरक्षा सम्बन्धी कडा मापदण्ड लागू गर्न बाध्य बनाएको छ। अब सामाजिक सञ्जाल कम्पनीहरूले प्रयोगकर्ताको उमेर केवल स्वघोषणाले स्वीकार गर्न पाउने छैनन्। उनीहरूले सरकारी डिजिटल परिचयपत्र, बायोमेट्रिक प्रमाणीकरण वा कृत्रिम बुद्धिमत्ता प्रणालीमार्फत उमेर निर्धारण गर्नुपर्नेछ।

सरकारले सामाजिक सञ्जाल कम्पनीहरूलाई निर्णय राजपत्रमा प्रकाशित भएदेखि अधिकतम १२ महिनाको संक्रमणकालीन अवधि दिएको छ। अभिभावकको खाताबाट प्रयोग गरेमा पनि कुनै छूट नरहने भनिएको छ। यूएई सरकारले बालबालिकाले अभिभावकको खाता प्रयोग गरेर नियम छल्ने सम्भावनालाई ध्यानमा राखेको छ। निर्णय अनुसार, प्लेटफर्महरूले अभिभावक वा संरक्षकको प्रोफाइलमार्फत बालबालिकाले खोलिएका खाताहरू पनि पहिचान गरी निष्क्रिय बनाउने आवश्यक कदम चाल्नुपर्नेछ।