जोर्डन अल्जेरियासँग पराजित हुँदै विश्वकपबाट बाहिरियो, अर्जेन्टिना समूह विजेता घोषित

अमेरिकाको सन फ्रान्सिस्को बे एरेना स्टेडियममा मंगलबार सम्पन्न खेलमा अग्रता कायम गर्न नसक्दा जोर्डन अल्जेरियासँग २–१ ले पराजित हुँदै फिफा विश्वकप २०२६ बाट बाहिरिएको छ। नवप्रवेशी जोर्डनले खेलको ३६औं मिनेटमा गोल गर्दै अग्रता लिएको थियो। निजार अल रशदानले गोल गर्दै जोर्डनलाई अगाडि पारेका थिए, तर त्यो अग्रता बचाउन सकिएन।

अल्जेरियाले ६९औं मिनेटमा रियाद महरेजको क्रसमा नाधीर बेनबोउलीले गोल गर्दै बराबरीमा फर्कायो। ८२औं मिनेटमा अमाइन गौइरीले गोल गर्दै अल्जेरियालाई पहिलो पटक अग्रता दिलाए। त्यसपछि दुवैतर्फबाट थप गोल भएन र अल्जेरिया विजयी भयो। अल्जेरियाले पहिलो जित निकाल्दै नकआउट चरणमा पुग्ने सम्भावना जीवित राख्दा जोर्डन समूह चरणबाटै बाहिरिएको छ।

समूह ‘जे’ मा अल्जेरिया ३ अंक जोड्दै तेस्रो स्थानमा छ। समान ३ अंक जोडेको अष्ट्रिया दोस्रो स्थानमा छ भने २ खेलबाट ६ अंक जोडेको साविक विजेता अर्जेन्टिना शीर्ष स्थानमा रहँदै समूह विजेता बनेको छ। पहिलोपटक विश्वकप खेलेको जोर्डन अंकविहीन छ।