क्रिस्टियानो रोनाल्डो लगातार ६ पटक फिफा विश्वकपमा गोल गर्ने पहिलो खेलाडी बनेका छन्। ९ असार, काठमाडौं। पोर्चुगलका स्टार फुटबलर क्रिस्टियानो रोनाल्डोले लगातार ६ फिफा विश्वकपमा गोल गर्ने कीर्तिमान स्थापित गरेका छन्। फिफा विश्वकप २०२६ को समूह के अन्तर्गत उज्बेकिस्तानविरुद्धको खेलमा गोल गरेपछि रोनाल्डोले यो महत्वपूर्ण उपलब्धि हासिल गरेका हुन्।
रोनाल्डोले सन् २००६ देखि २०२६ सम्म लगातार ६ विश्वकप प्रतियोगितामा खेलेर सबैमा गोल गर्न सफल भएका छन्। यसअघि समूहको पहिलो खेलमा डिएर कंगोविरुद्ध गोल गर्न नसकेका रोनाल्डोले उज्बेकिस्तानविरुद्ध खेलको छैटौं मिनेटमै गोल गर्दै पोर्चुगललाई अघि बढाएका छन्। सन् २००६ को डेब्यु विश्वकपमा रोनाल्डोले १ गोल गरेका थिए भने २०१० र २०१४ मा समान रूपमा १-१ गोल गरेका थिए।
त्यसैगरी सन् २०१८ को विश्वकपमा स्पेनविरुद्ध उनले ह्याट्रिक गर्दै ४ गोल गरेका थिए। २०२२ मा पनि उनले १ गोल गरेका थिए भने हाल उत्तर अमेरिकी महादेशमा भइरहेको विश्वकपमा पनि १ गोल गरिसकेका छन्। रोनाल्डो विश्वकपमा गोल गर्ने दोस्रो सबैभन्दा वृद्ध खेलाडी पनि बनेका छन्। उनी ४१ वर्ष १३८ दिनको उमेरमा उज्बेकिस्तानविरुद्ध गोल गरेका हुन्। यसअघि क्यामरुनका रोजर मिल्लाले ४२ वर्ष ३९ दिनको उमेरमा सन् १९९४ को विश्वकपमा रसियाविरुद्ध गोल गरेको रेकर्ड राखेका थिए।
