९ असार, काठमाडौं । जुडोका विजय सिंजाली र कराँतेकी एरिका गुरुङलाई मंगलबार एनओसी अवार्ड २०२६ मा सर्वश्रेष्ठ खेलाडीको रूपमा सम्मानित गरिएको छ। पुरुषतर्फ विजय र महिलातर्फ एरिकाले एनओसी अवार्ड जितेको जानकारी गराइएको छ। यसैगरी कराँतेका कुशल श्रेष्ठलाई एनओसी उत्कृष्ट पुरुष प्रशिक्षक र कबड्डीकी हरिना थापालाई एनओसी उत्कृष्ट महिला प्रशिक्षक घोषित गरियो।
एनओसी उत्कृष्ट युवा खेलाडी २०२६ मा बक्सिङका नुर्बु थेन्डुप शेर्पा र टेनिसकी शिवाली गुरुङलाई सम्मानित गरियो। बक्सर नुर्बुलाई एनओसी सर्वश्रेष्ठ युवा पुरुष खेलाडी र शिवालीलाई एनओसी उत्कृष्ट महिला युवा खेलाडी घोषणा गरिएको छ। एनओसी उत्कृष्ट खेल पत्रकार प्रिन्टको अवार्ड खेलाडी डटकमका सम्पादक अजय फुयालले प्राप्त गरेका छन् भने वरिष्ठ खेल संवाददाता सरिता श्रेष्ठले एनओसी उत्कृष्ट अनलाइन खेल पत्रकार अवार्ड हासिल गरिन्।
एनओसी सर्वश्रेष्ठ क्यामरापर्सनको सम्मान सुदर्शन रञ्जितलाई दिइयो। नेपाल कराँते महासंघलाई उत्कृष्ट संघको रूपमा घोषित गरिएको छ। हरेक विधाका विजेता खेलाडीहरूले ५० हजार रुपैयाँ र ट्रफीसहित कार्पेट पुरस्कार स्वरूप प्राप्त गरेका छन्। न्यु होराइन कार्पेट प्रा.लिले विजेताहरूलाई कार्पेट प्रायोजन गरेको छ।
यसैगरी, एनओसी प्रेसिडेन्सियल अवार्डबाट अशोकरत्न वज्राचार्य, गीता राणा, चतुरानन्द राजवैद्य, नेपाल भूतपूर्व खेलाडी मञ्च, शरदचन्द्र शाह मेमोरियल फाउन्डेसन, थन्डरबोल्ट स्पोर्ट्स एकेडेमी (जेम्स स्कुल), सुर्यलाल भण्डारी र लक्ष्मी श्रेष्ठलाई सम्मानित गरिएको छ। एनओसी अध्यक्ष जीवनराम श्रेष्ठले विजेताहरूलाई बधाई दिँदै प्रत्येक वर्ष जुन २३ को दिन ओलम्पिक दिवस मनाउने क्रममा एनओसीले अवार्ड कार्यक्रम गर्दै आएको जानकारी दिए। यसैगरी एनओसी महासचिव राजीव श्रेष्ठले धन्यवाद ज्ञापन गरे भने अवार्ड कार्यक्रमका संयोजक तथा एनओसी उपाध्यक्ष गोपाल सुन्दरलाल कक्षपतिले स्वागत मन्तव्य राखेका थिए।
