न्यु डायमन्ड युथ स्पोर्ट्सले यू–१९ भलिबल उपाधि जितियो

१० असार, काठमाडौं। टिप टप न्यु डायमन्ड युथ स्पोर्ट्स क्लबले बुधबार मदन भण्डारी कप यू–१९ विद्यालयस्तरीय बागमती प्रदेश छात्रा भलिबल प्रतियोगितामा उपाधि जितेको छ। मनमैजुस्थित एन्जल्स स्पोर्ट्स एकेडेमीमा सम्पन्न फाइनल खेलमा टिप टप न्यु डायमन्डले न्यु डायमन्ड एकेडेमीलाई २५–१६, २५–९, २५–१० को सेटमा पराजित गर्दै च्याम्पियन बन्न सफल भयो। मदन भण्डारी स्पोर्ट्स एकेडेमीको आयोजनामा भएको प्रतियोगितामा गणेश हिमालले तेस्रो स्थान हासिल गर्यो। गणेश हिमालले सरस्वती मावि, हेलम्बुलाई २५–१८, २५–१६, २५–१३ को सेटमा पराजित गर्यो।

शीर्ष चार स्थान हासिल गर्ने टिमले क्रमशः १ लाख, ५० हजार, ३० हजार र १५ हजार रुपैयाँ नगद पुरस्कार प्राप्त गरे। प्रतियोगितामा टिप टप न्यु डायमन्ड युथ स्पोर्ट्सकी निशा महर उत्कृष्ट खेलाडी घोषित भइन् र १० हजार रुपैयाँ नगद पुरस्कार प्राप्त गरिन्। न्यु डायमन्ड युथ स्पोर्ट्सकै जेनिशा विश्वकर्मा उत्कृष्ट स्पाइकर, सलिना गुरुङ उत्कृष्ट ब्लकर र कुमार राई उत्कृष्ट प्रशिक्षक घोषित भए। यस्तै, न्यु डायमन्डकी गृष्मा गुरुङ उत्कृष्ट डिफेन्डर, नम्सार राना उत्कृष्ट सेटर र एलिशा श्रेष्ठ उत्कृष्ट सर्भर बने। सबै विधागत उत्कृष्ट खेलाडीहरूले जनही ५ हजार रुपैयाँ नगद पुरस्कार प्राप्त गरे।

विजेतालाई राष्ट्रिय खेलकुद परिषद्का पूर्व उपाध्यक्ष समेत रहेका आयोजक एकेडेमीका अध्यक्ष ध्रुव आचार्य, प्रतियोगिता संयोजक तथा मदन भण्डारी स्पोर्ट्स एकेडेमी बागमती प्रदेशका अध्यक्ष राम केसी लगायतले एक समारोहका बीच पुरस्कार वितरण गरे। चार दिनसम्म चलेको प्रतियोगितामा ८ टिमले लिग र नकआउट प्रणालीमा प्रतिस्पर्धा गरेका थिए।