बिहीबार बिहान सम्पन्न खेलमा ब्राजिलले स्कटल्यान्ड र मोरक्कोले हाइटीलाई पराजित गर्दै नकआउट चरणमा स्थान बनाउन सफल भएका छन्। ११ असार, काठमाडौं। ब्राजिल र मोरक्कोले फिफा विश्वकप २०२६ को नकआउट चरणमा प्रवेश गरेका छन्। बिहीबार बिहान भएका खेलमा ब्राजिलले स्कटल्यान्डलाई र मोरक्कोले हाइटीलाई हराउँदै अघि बढेका हुन्। समूह ‘सी’ अन्तर्गत एटलान्टा स्टेडियममा मोरक्कोले हाइटीलाई ४-२ ले पराजित गर्यो भने मियामी स्टेडियममा ब्राजिलले स्कटल्यान्डलाई ३–० ले हराउँदै समूह विजेता बनेको छ।
ब्राजिलसँग ७ अंक छन्, जबकि हेड टु हेड आधारमा मोरक्को समान ७ अंकसहित उपविजेता बनेको छ। स्कटल्यान्डमाथि सहज जीत निकालेका ब्राजिलका भिनिसियस जुनियरले दुई गोल गरे भने मथेउस कुन्हाले एक गोल थपे। भिनिसियसले खेलको सातौँ मिनेटमै गोल गरी पहिलो अग्रता दिलाएका थिए। उनले पहिलो हाफको इन्जुरी समयमा आफ्नो दोस्रो गोलमार्फत अग्रता दोब्बर बनाए। ६०औं मिनेटमा कुन्हाले गोल गर्दै अग्रतालाई थप मजबुत बनाए।
हाइटीले दुईपटक अग्रता जोगाउन नसक्दा जितविहीन रहन बाध्य भयो। मोरक्कोले हाइटीलाई ४-२ ले हरायो। १०औं मिनेटमा आत्मघाती गोलको माध्यमबाट मोरक्कोले अग्रता लिए। ३९औं मिनेटमा हाइटीले बराबरी गोल फर्कायो। ४३औं मिनेटमा हाइटीले दोस्रो पटक अग्रता लियो तर त्यो अग्रता टिकाउन सकिएन। पहिलो हाफको इन्जुरी समयमा मोरक्कोले गोल गर्दै बराबरीमा ल्यायो। खेलको ७८औं मिनेटमा पहिलो पटक अग्रता लिएको मोरक्कोले ८९औं मिनेटमा दोस्रो गोल गरेकाे थियो र अग्रता दुई गोलसम्म पुर्यायो। त्यसपछि कुनै गोल भएन र मोरक्को विजयी भयो। हाइटी प्रतियोगिताबाट पहिले नै बाहिरिएको छ भने स्कटल्यान्डको नकआउट चरणमा पुग्ने सानोतिनो सम्भावना कायम छ।
