अमेरिकाको डालास स्टेडियममा शुक्रबार बिहान सम्पन्न खेलमा १–१ को बराबरी खेल्दै जापान र स्वीडेन दुवै टोलीले नकआउट चरणमा स्थान सुरक्षित गरेका छन्। ११ असार, काठमाडौं। बराबरीसँगै जापान र स्वीडेन फिफा विश्वकप २०२६ को नकआउट चरणमा प्रवेश गरेका छन्।
खेलको ५६औं मिनेटमा दाइजेन माएदाले गोल गर्दै जापानलाई अग्रता दिलाएका थिए। त्यसको ६ मिनेट भित्रै स्वीडेनले गोल फर्काउँदै खेलमा समानता कायम गर्यो। स्वीडेनका एन्थोनी एलान्गाले गोल गरेका थिए। जापान ५ अंकसहित समूह ‘एफ’ को उपविजेता बनेर नकआउट चरणमा पुगेको छ भने ४ अंकसहितको स्वीडेन तेस्रो स्थानबाट उत्कृष्ट ८ टोलीमा सामेल हुँदै नकआउट चरणमा प्रवेश गरेको छ।
नेदरल्यान्ड्सले ७ अंक बटुलेर समूह विजेता बनेर नकआउट चरणमा प्रवेश गरेको छ भने ट्युनिसिया अंक विहीन भई विश्वकपबाट बाहिरिएको छ। नेदरल्यान्ड्स नकआउट चरणमा समूह ‘सी’ को उपविजेता मोरक्कोसँग प्रतिस्पर्धा गर्नेछ। जापान लगातार तेस्रो पटक नकआउट चरणमा प्रवेश गर्न सफल भएको हो। सन् १९९८ मा पहिलोपटक विश्वकप खेलेको जापानले सन् २०१८, २०२२ र यसपटक पनि नकआउट चरणमा स्थान सुरक्षित गरेको छ।
स्वीडेनले सन् १९५८ मा फाइनलमा प्रवेश गरेको थियो भने सन् २०१८ को विश्वकपमा क्वार्टरफाइनलसम्म पुग्न सफल भएको थियो। स्वीडेनले सन् २०२२ को विश्वकप छनोटमा स्थान बनाउने अवसर गुमाएपछि यसपटक नकआउट चरणमा प्रवेश गरेको हो। नेदरल्यान्ड्स भने तीन पटकको उपविजेता हुँदै लगातार नकआउट चरणबाट अघि बढिरहेको छ।
