सोमपाल कामी, जो क्रिकेटर हुन् र जसको खेल जीवन तथा कौशलका बारेमा धेरैलाई जानकारी छ, उनको जीवनको अर्को पाटो पनि छ जुन धेरैलाई थाहा नहुन सक्छ। उनी आध्यात्मिक, करुणामय र समभावले भरिपूर्ण व्यक्तित्वका धनी हुन्। उनी पशुपक्षीप्रतिको माया र चिन्ता व्यक्त गर्छन्। त्यसैले कहिलेकाहीं क्रिकेट मैदानमा आइपुग्ने कुकुरलाई माया गरेर स्पर्श गरिरहेका हुन्छन् र काठमाडौं आसपासका कुकुर आश्रयस्थलहरूमा फुर्सदको समय बिताइरहेका हुन्छन्। सामुदायिक कुकुरहरूको हेरचाह र संरक्षणमा समेत उनले सक्रिय सहयोग पुर्याइरहेका छन्।
सोमपालले सडकका कुकुरसँग खेलिरहेको फोटो फेसबुकमा पोष्ट गर्दै क्याप्सन लेखेका छन्, ‘सडकका कुकुरहरू खतरनाक हुन्छन्। सडकका कुकुर र म।’ यो स्टाटसले सडकका कुकुरप्रतिको समाजको धारणा माथि व्यंग्यात्मक टिप्पणी गरेको देखिन्छ। उनी आफैंले पनि घरमा कुकुर पाल्छन् र उक्त कुकुरको फोटो पृष्ठभूमिमा राखेर लेख्छन्, ‘यदि तपाईं भाग्यमानी हुनुहुन्छ भने कुनै न कुनै दिन एउटा कुकुर तपाईंको जीवनमा पर्छ। तपाईंको मुटु जित्छ। अनि तपाईंको जीवन नै बदलिदिन्छ।’
सोमपाल कुकुरसँगको निकटता र सम्बन्धले आफ्नो जीवनलाई उन्नत र सुन्दर बनाएकोमा दृढ विश्वास गर्छन्। उनले फेसबुकमा कुकुरसँग व्यायाम गरिरहेको, आराम गरिरहेको र फोटोसुट गरिरहेको कतिपय फोटोहरू सेयर गरेका छन्। एक स्थानमा उनले मस्त निदाइरहेको, उनको प्रेमपूर्ण कुकुरको फोटो राखेर लेखेका छन्, ‘उसले हरेक दिन मेरो दिन खुसी बनाइदिन्छ।’ हालै उनले गाईवस्तुसँगको भिडियो पोष्ट गरेका छन्, जसमा उनी गाईलाई आँप खुवाइरहेका छन्। यसमा कुनै क्याप्सन छैन, जसले आफैंमा दृश्यलाई प्रभावकारी बनाइरहेको छ। पृष्ठभूमिमा फिल्म ‘लाल सिंह चड्डा’ को गीत बजिरहेको छ, ‘क्या पता हम मैं हुँ कहानी …।’
