१२ असार, काठमाडौं। पाँच पटकको विश्वकप विजेता ब्राजिलले फिफा विश्वकप २०२६ को राउन्ड अफ ३२ मा जापानसँग प्रतिस्पर्धा गर्ने क्रममा छ। समूह एफको अन्तिम खेलमा जापानले स्विडेनसँग १–१ को बराबरी खेल्दै समूह उपविजेताको रूपमा नकआउट चरणमा प्रवेश गरेको छ। समूह एफको विजेता नेदरल्यान्ड्स बनेको छ। ब्राजिल यसअघि समूह ‘सी’ मा दुई जित र एक बराबरीसहित शीर्ष स्थानमा रहेर राउन्ड अफ ३२ मा पुगेको थियो। समूह ‘सी’ को उपविजेता मोरक्कोले अब नेदरल्यान्ड्ससँग प्रतिस्पर्धा गर्नेछ।
ब्राजिल र जापानबीचको राउन्ड अफ ३२ को खेल जुन २९ मा अमेरिकाको ह्युस्टन स्टेडियममा आयोजना हुनेछ। जापानले गत अक्टोबर २०२५ मा सम्पन्न अन्तर्राष्ट्रिय मैत्रीपूर्ण खेलमा ब्राजिललाई ३–२ ले हराउँदै इतिहास रचेको थियो। १४ पटकको भेटघाटमा जापानको त्यो ब्राजिलविरुद्ध पहिलो जीत थियो। यद्यपि विश्वकपमा यी दुई टोलीबीच अहिलेसम्म केवल एकपटक मात्रै भिडन्त भएको छ। सन् २००६ को विश्वकप समूह चरणमा ब्राजिलले जापानलाई ४–१ को ठूलो अन्तरले हराएको थियो। जापान पछिल्ला वर्षहरूमा युरोपेली र दक्षिण अमेरिकी शक्तिशाली टोलीविरुद्ध उत्कृष्ट प्रदर्शन गर्दै आएको छ भने ब्राजिल उपाधिको प्रमुख दावेदारका रूपमा मैदानमा उत्रने भएकाले राउन्ड अफ ३२ को यो खेल सबैभन्दा आकर्षक प्रतिस्पर्धामध्ये एक बन्ने आशा गरिएको छ।
