डेम्बेले विश्वकपमा फ्रान्सका लागि ह्याट्रिक गर्ने तेस्रो खेलाडी बनेका छन्। यसअघि जस्ट फोन्टेनले सन् १९५८ को विश्वकपमा दुई पटक ह्याट्रिक गरेका थिए भने किलियन एमबाप्पेले सन् २०२२ को विश्वकपमा एक पटक ह्याट्रिक गरेका थिए। १३ असार, काठमाडौं। उसमान डेम्बेलेले गरेको ह्याट्रिकपछि फ्रान्सले फिफा विश्वकप २०२६ अन्तर्गत समूहको अन्तिम खेलमा नर्वेलाई ४-१ ले पराजित गरेको छ। लगातार तेस्रो जित दर्ता गर्दै फ्रान्स समूह आई को विजेता बनेको छ। यसअघिसम्म नकआउट चरणमा स्थान सुनिश्चित गरिसकेको फ्रान्स र नर्वेको खेल समूह विजेता निर्णय गर्ने निर्णायक खेल रह्यो।
फ्रान्सले नर्वेलाई पराजित गर्दै समूह चरणमा शतप्रतिशत जित हासिल गरेको हो। फ्रान्सले यसअघि सेनेगाललाई ३-१ र इराकलाई ३-० ले हराएको थियो। २८ वर्षपछि फिफा विश्वकपमा फर्केको नर्वेले समूह उपविजेता बनेर नकआउट चरणमा प्रवेश पाएको छ। फ्रान्स अब समूह एफ वा जी मध्ये कुनै एकको तेस्रो स्थानमा रहेका टोलीसँग खेल्नेछ भने नर्वे समूह ई को उपविजेता आइभरी कोस्टसँग भिड्नेछ। अमेरिकाको बोस्टन स्टेडियममा भएको खेलमा डेम्बेलेले पहिलो हाफमा ३२ मिनेटभित्रै ह्याट्रिक पूरा गरेका थिए।
नर्वेले आफ्नो मुख्य गोलकर्ता एर्लिङ हालान्डलाई आजको खेलमा विश्राम दिएको थियो। यसअघि पहिलो रोजाइमा १० खेलाडी परिवर्तन गरेको नर्वेले फ्रान्सलाई चुनौती दिएको थियो भने दोस्रो हाफमा पेनाल्टी पाएको अवसर गोलमा परिणत गर्न सकेन। डेम्बेलेले खेलको सातौं मिनेटमा पहिलो गोल गर्दै फ्रान्सलाई अग्रता दिलाए। २०औं मिनेटमा उनले व्यक्तिगत दोस्रो गोल गर्दै अग्रता दोब्बर बनाए। त्यसको एक मिनेटपछि नर्वेका थेलो आसगार्डले गोल गर्दै खेलमा फर्कने प्रयास गरे। तर डेम्बेलेले ३२औं मिनेटमा गोल गरी ह्याट्रिक पूरा गर्दै फ्रान्सलाई ३-१ को अग्रता दिलाए। यो विश्वकपमा भएको तेस्रो ह्याट्रिक हो, पहिले अर्जेन्टिनाका कप्तान लियोनल मेसी र क्यानडाका जोनाथन डेभिडले ह्याट्रिक गरेका थिए।
डेम्बेले फ्रान्सका लागि विश्वकपमा ह्याट्रिक गर्ने तेस्रो खेलाडी हुन्। पूर्वमा जस्ट फोन्टेनले सन् १९५८ को विश्वकपमा दुई ह्याट्रिक गरेका थिए भने किलियन एमबाप्पेले सन् २०२२ को विश्वकपमा एक ह्याट्रिक गरेका थिए। दोस्रो हाफमा नर्वेले गोल गर्ने अवसरहरू गुमाएको थियो। नर्वेका योर्गन स्ट्रान्ड लार्सनले पेनाल्टीमा गोल गर्न सकेनन्। ५०औं मिनेटमा उनको पेनाल्टी प्रहार फ्रान्सका गोलकिपर माइकल माइगनानले बचाएका थिए। फ्रान्सका डिजायर डोएले दोस्रो हाफको इन्जुरी टाइमको चौथो मिनेटमा गोल गर्दै स्कोर ४-१ बनाएका थिए।
