नेदरल्यान्ड्समा हुन लागेको स्ट्रिट फुटबल विश्वकपका लागि एक्सट्रिम फुटबल फेवर थ्री भी थ्री छनोट प्रतियोगिता गरिने
लिगकम नकआउट प्रणालीअनुसार सञ्चालन हुने यो प्रतियोगितामा लिग चरणका खेलपछि प्रत्येक समूहका विजेता, उपविजेता साथै उत्कृष्ट तेस्रो टोली गरी जम्मा १८ टोली नकआउट चरणमा प्रवेश गर्नेछन् र यसले कुल ६४ टोलीलाई नकआउट चरणमा स्थान दिलाउनेछ। नेदरल्यान्ड्समा आयोजना हुन लागेको आइएसएफए स्ट्रिट फुटबल विश्वकपका लागि नेपालमा चयन प्रतियोगिता जुलाई १ देखि ८ सम्म सञ्चालन हुनेछ। प्रतियोगितामा ९५ टोली सहभागी हुनेछन् र विजेता टोली आगामी सेप्टेम्बरमा विश्वकपमा नेपालको प्रतिनिधित्व गर्नेछ। प्रतियोगिताका खेलहरू काठमाडौंका पाँच ऐतिहासिक स्थानमा फ्लडलाइटको व्यवस्था सहित लिगकम नकआउटका आधारमा सञ्चालन गरिनेछ। १४ असार, काठमाडौं।
नेपालमा स्ट्रिट फुटबलको समृद्ध इतिहास पुनः स्थापित गर्ने उद्देश्यका साथ एक्सट्रिम फुटबल फेवर थ्री भी थ्री आइएसएफए स्ट्रिट फुटबल विश्वकपका लागि छनोट प्रतियोगिता आयोजना गर्न लागिएको छ। एलपीएस म्यानेजमेन्ट, एथ्लेट इनह्यान्समेन्ट सेन्टर (एइसी) र ट्रिपल टु प्रोडक्सनको संयुक्त आयोजनामा, यो प्रतियोगिता जुलाई १ देखि ८ (असार १७ देखि २४) सम्म उपत्यकाका विभिन्न स्थानहरूमा सञ्चालन गरिने भएको छ।
प्रतियोगिता पूर्ण रूपमा एक्सट्रिम फुटबलको सहयोगमा हुनेछ र यसमा ९५ टोली सहभागी हुने आयोजकहरूले जानकारी दिएका छन्। ती टोलीहरूलाई २३ समूहमा विभाजन गरिएको छ। लिगकम नकआउटका आधारमा सञ्चालन हुने यस प्रतियोगितामा लिग चरण पछि प्रत्येक समूहका विजेता, उपविजेता र उत्कृष्ट तेस्रो १८ टोली नकआउट चरणमा प्रवेश गर्नेछन्, जसमा कुल ६४ टोली रहनेछन्। त्यसपछिका चरणहरूमा राउन्ड अफ ६४, ३२, १६, क्वार्टरफाइनल, सेमिफाइनल र फाइनल खेलहरू आयोजना हुनेछ।
प्रतियोगिता विजेताले आगामी सेप्टेम्बर २ देखि ६ सम्म नेदरल्यान्ड्सको युट्रेक्टमा आयोजना हुने आइएसएफए स्ट्रिट फुटबल विश्वकपमा भाग लिनेछन्, जानकारी एलपीएस म्यानेजमेन्टका सिइओ तथा आइएसएफए कन्ट्री हेड बिकल्प खरेलले दिएका छन्। विश्वकपमा नेपालको प्रतिनिधित्व गर्न ४ खेलाडी, १ व्यवस्थापक र १ प्रशिक्षक गरी ६ सदस्यीय टोली जानेछ र प्रायोजकहरूले सहयोग गर्ने खरेलले बताए।
प्रतियोगिताका खेलहरू आइएसएफएका थ्री भी थ्री स्ट्रिट फुटबल नियमहरू अनुसार सञ्चालन हुनेछ। प्रत्येक खेल १० मिनेट लामो हुने छ र साइज ४ को फुटसल बलको प्रयोग गरिने बताइएको छ। काठमाडौंको मौलिक संस्कृति र स्ट्रिट फुटबलको वास्तविक रोमाञ्चक वातावरण सिर्जना गर्न पाँचवटा ऐतिहासिक स्थान छनोट गरिएको छ, जहाँ समूह चरणका खेलहरू आयोजना गरिनेछन्। ब्राजिलको प्रसिद्ध साम्बा स्ट्रिट फुटबल शैलीसँग मेल खाने गरी स्थानीय संस्कृतिलाई जोड्नका लागि कुमा नानी, टेकु, तबाहल, लगन, ओमबहाल र तेबहाल संकटामा यी खेलहरू सञ्चालन गरिनेछन्।
खेलहरू अपराह्न ३ बजेदेखि बेलुका ८ बजेसम्म फ्लडलाइटको प्रकाशमा सञ्चालन हुने र खेल अवधिमा विशेष सङ्गीत तथा मनोरञ्जनात्मक प्रस्तुतीहरू पनि हुने आयोजकहरूले बताएका छन्। सन् २०२३ मा स्थापना भएको इन्टरनेसनल स्ट्रिट फुटबल एसोसियसन (आइएसएफए) विश्वका स्ट्रिट फुटबल खेलाडीहरूलाई एउटै छत मुनि ल्याउने उद्देश्य राख्दछ। गत वर्ष नेपालले लात्भियामा भएको आइएसएफए स्ट्रिट फुटबल विश्वकपमा सहभागिता जनाएको थियो।
