नेपाल आर्मीले ३०औं पुरुष तथा ११औं महिला राष्ट्रिय बक्सिङ प्रतियोगितामा सबै ११ स्वर्ण पदक जित्दै आफ्नो वर्चस्व कायम राखेको छ। त्रिपुरेश्वरस्थित राखेप कभर्डहलमा सम्पन्न उक्त प्रतियोगितामा पुरुषतर्फ ६ र महिलातर्फ ५ स्वर्ण पदकका लागि प्रतिस्पर्धा भएको थियो। १४ असार, काठमाडौं।
प्रतियोगितामा पुरुष वर्गमा ५५ केजी तौलमा प्रेम चौधरी, ६० केजीमा नितेश नेपाली, ७० केजीमा गेशकुमार श्रेष्ठ, ८० केजीमा दीपक श्रेष्ठ, ९० केजीमुनि मदन कार्की र ९० केजी माथि गणेश प्रधानले स्वर्ण पदक जितेका छन्। महिला वर्गमा भने ५१ केजीमुनि आरती भोम्जन, ५४ केजीमा वर्षा श्रेष्ठ, ६० केजीमा पुनम रावल, ६५ केजीमा चन्द्रकला थापा र ७५ केजीमा निरु गुरुङले पहिलो स्थान हासिल गरेका छन्।
विजेताहरूलाई शिक्षा तथा खेलकुद मन्त्रालयका प्रमुख सल्लाहकार सिद्धी व्यञ्जनकार, सल्लाहकार राजु सिंह, राखेप कार्यकारी समितिका सदस्य पवन शाही, नेपाल ओलम्पिक कमिटीका महासचिव राजीव श्रेष्ठ, आयोजक बक्सिङ संघका अध्यक्ष राम अवाले तथा महासचिव मानबहादुर भण्डारीले एक समारोहमा पुरस्कृत गरेका छन्।
