‘केवल सम्पत्ति व्यवस्थापन कम्पनी सुरु गरेपछि मात्र बैंकिङ क्षेत्रमा समस्या समाधान हुँदैन’

नबिल बैंकका सीईओ मनोज ज्ञवालीले एसेट म्यानेजमेन्ट कम्पनीले बैंकिङ क्षेत्रका सबै समस्या जादुमयी रूपमा समाधान गर्न नसक्ने बताएका छन्। उनले बैंकहरूको खराब कर्जा ५.६ प्रतिशत पुगेको चुनौतीपूर्ण भए पनि यो दक्षिण एसियाली क्षेत्रमै दोस्रो सबैभन्दा न्यून रहेको स्पष्ट पारेका छन्। बैंकमा रहेका सर्वसाधारणको निक्षेप डुब्ने वा क्षति हुने कुरा निकै टाढाको विषय भएको उनको दाबी छ।

ज्ञवालीले भने कि एसेट्स म्यानेजमेन्ट कम्पनी (एएमसी) स्थापना गरे मात्र बैंकिङ क्षेत्रका सबै समस्या जादुमय रूपमा समाधान हुने कुरा होइन। एएमसीले समस्यामा परेका कम्पनीहरूको व्यावसायिक सम्भाव्यता अनुसन्धान गरी, वित्तीय व्यवस्थापन र नगद प्रवाह सुधार गर्दै पुनर्संरचना र रुपान्तरण गर्ने काम गर्छ। उनले भने, ‘एएमसीले ठ्याक्कै बैंकहरूको सम्पत्ति किन्ने र हामी निश्चिन्त भएर बस्ने भन्ने कुरा कुनै बैंकले सोचिरहेको छैन र एएमसीले सबै सम्पत्ति लिन पनि सक्दैन।’

ज्ञवालीले खराब कर्जा बढेको कारणले बैंकहरू जर्जर र बर्बाद हुनु गलत दाबी भएको बताए। उनले भने, ‘विगतको १.५ वा १.६ प्रतिशतको तुलनामा एनपीए ५.६ प्रतिशत पुगेको चुनौतीपूर्ण भए पनि यो दक्षिण एसियाली क्षेत्रमै दोस्रो सबैभन्दा न्यून दर हो।’ उनले पाकिस्तानमा करिब १० प्रतिशत, श्रीलंकामा १० प्रतिशतभन्दा माथि र बंगलादेशमा करिब ३० प्रतिशत एनपीए रहेको तथ्यांक प्रस्तुत गरे।

ज्ञवालीले आयकर ऐन अनुसार ५ प्रतिशतसम्मको एनपीए डिडक्सनयोग्य मानिने र नेपाल राष्ट्र बैंकको सर्कुलरले त्यसै सीमाभित्र कतिपय सुविधा तोकेको हुँदा ५ प्रतिशतलाई ठुलो समस्या भनेर प्रस्तुत गर्नु उचित नरहेको स्पष्ट पारे। उनले नेपाली बैंकहरूले नियमित कर्जामा समेत १ प्रतिशत प्रोभिजनिङ गर्ने भएकाले बैंकहरूको कमजोरी अवस्थामा नरहेको बताए। ‘आजको दिनमा बैंकमा रहेका सर्वसाधारणको निक्षेप डुब्ने वा नोक्सान हुने कुरा निकै टाढाको विषय हो,’ उनले जोड दिएका छन्।