अमेरिका र इरानले पछिल्ला सैन्य आक्रमणपछि तनाव कम गर्न आ-आफ्ना सेनाहरू होर्मुज स्ट्रेट क्षेत्रबाट पछि हटाउन सहमति जनाएका छन्। अमेरिकी अधिकारीहरूको अनुसार यस सहमतिपछि व्यावसायिक तथा मालबाहक जहाजहरूले सो समुद्री मार्गबाट स्वतन्त्र रूपमा आवतजावत गर्न सक्नेछन्। युद्ध पूर्ण रूपमा अन्त्य गर्न कतारमा दुई देशबीच प्राविधिक वार्ताहरू जारी रहेका छन्, यद्यपि इरानले अहिलेसम्म यस विषयमा औपचारिक टिप्पणी गरेको छैन। १५ असार, काठमाडौं।
पछिल्ला केही दिनहरूमा भएका शृंखलाबद्ध सैन्य आक्रमण र प्रतिआक्रमण पछि अमेरिका र इरानले आ-आफ्ना सेनाहरूलाई पछि हटाएर तनाव कम गर्न सहमति जनाएका छन्। मिडिया रिपोर्टहरूमा एक वरिष्ठ अमेरिकी अधिकारीको भनाइलाई उद्धृत गरी यो जानकारी प्रस्तुत गरिएको हो। रणनीतिक रूपमा अत्यन्त महत्वपूर्ण हुने होर्मुज स्ट्रेट र यसको वरिपरिका समुद्री क्षेत्रमा भएका पछिल्ला भिडन्तपछि दुवै पक्षले एकअर्कामाथि युद्धविराम उल्लंघनको आरोप लगाएका थिए।
अमेरिकी अधिकारीले बीबीसीको अमेरिकी साझेदार सञ्चारमाध्यम ‘सीबीएस न्यूज’ लाई उक्त सहमतिको पुष्टि गर्दै अब व्यावसायिक र मालबाहक जहाजहरूले स्वतन्त्र रूपमा यस समुद्री मार्गबाट आवतजावत गर्न सक्ने उल्लेख गरेका छन्। दुई देशबीच जारी युद्धपूर्ण अवस्था पूर्ण रूपमा अन्त्य गर्ने उद्देश्यले कतारमा नयाँ चरणको प्राविधिक वार्ता पनि जारी रहेको बताए। तर, होर्मुज स्ट्रेटमा आक्रमण रोक्ने र सेना सो क्षेत्रबाट पछि हटाउने विषयमा यी रिपोर्टहरूको प्रकासित पछाडि इरानले अहिलेसम्म आधिकारिक कुनै प्रतिक्रिया दिइसकेको छैन।
यस अघि गत जेठ ३२ गते अमेरिका र इरानले पाकिस्तानको मध्यस्थतामा १४ बुँदे ऐतिहासिक समझदारीपत्र (एमओयू) मा हस्ताक्षर गरेका थिए, जसमा ‘सबै मोर्चामा सैन्य अभियान तुरुन्त र स्थायी रूपमा समाप्त गर्ने’ प्रावधान राखिएको थियो। तर सम्झौता पश्चात पनि सिंगापुरको झण्डा बोकेको ‘एभर लभ्ली’ लगायतका जहाजमाथि भएका आक्रमण र त्यसको जवाफमा अमेरिकी सेन्ट्रल कमाण्डले इरानी सैन्य ठेगानामा गरेको प्रहारले युद्धविराम जोखिममा परेको थियो। नयाँ सहमतिले तत्कालका लागि युद्धको जोखिमलाई घटाएको र विश्वव्यापी ऊर्जा बजारको जीवनरेखा मानिने होर्मुज स्ट्रेटमा पुनः सहजता ल्याउने अपेक्षा गरिएको छ।
