नेपाल राष्ट्र बैंकले आधा दर्जन लघुवित्तलाई छिटो सुधारात्मक कारबाही गर्‍यो

नेपाल राष्ट्र बैंकले न्यूनतम पूँजी कोष अनुपात कायम नगरेका आरम्भ चौतारी, गणपति, सामुदायिक, नेरुडे र सीवाईसीसहित आधा दर्जन लघुवित्तलाई छिटो सुधारात्मक कारबाही गरेको छ। केन्द्रीय बैंकले कर्जा नोक्सानी व्यवस्थाको रकम नियमविपरीत आम्दानीमा देखाएको भन्दै लघुवित्तका प्रमुख कार्यकारी अधिकृतहरूलाई सचेत गराएको छ।

धौलागिरी लघुवित्तका सञ्चालक समितिले सवारी साधन खरिदमा आर्थिक नियम पालना नगरेको तथा कर्मचारी पुनर्बहालीमा त्रुटि गरेको भन्दै बैंकले सञ्चालक समितिलाई सचेत गराएको छ। १५ असार, काठमाडौं। नेपाल राष्ट्र बैंकले आधा दर्जन लघुवित्त वित्तीय संस्थालाई छिटो सुधारात्मक कारबाही गरेको हो। केन्द्रीय बैंकको कारबाहीमा पर्नेमा आरम्भ चौतारी, गणपति, सामुदायिक, नेरुडे र सीवाईसी लघुवित्त वित्तीय संस्था छन्।

बैंकका अनुसार आरम्भ चौतारीले २०८२ असार मसान्तमा न्यूनतम पूँजी कोष अनुपात ७.७७ प्रतिशत मात्र कायम गरेको छ। उक्त अनुपात नियामकीय मापदण्ड अनुसार नपुगेकोले बैंक तथा वित्तीय संस्थाको छिटो सुधारात्मक कारबाही सम्बन्धी विनियमावली, २०७४ अनुसार कारबाही भएको बैंकले जनाएको छ। लघुवित्त वित्तीय संस्थाले ८ प्रतिशत पूँजी कोष कायम गर्नुपर्ने व्यवस्था छ।

गणपति लघुवित्त वित्तीय संस्थालाई पनि पूँजी कोष कायम नगरेको भन्दै कारबाही गरिएको छ। २०८२ असोज मसान्तमा संस्थाले न्यूनतम पूँजी कोष अनुपात ६.०६ प्रतिशत मात्र कायम गरेको हुँदा कारबाहीमा परेको हो। सामुदायिक लघुवित्त वित्तीय संस्थाले २०८२ असार मसान्तमा न्यूनतम पूँजी कोष अनुपात ६.१२ प्रतिशत मात्र कायम गरेपछि कारबाहीमा परेको छ।