समूह चरणमा शतप्रतिशत जित हासिल गर्दै नकआउट चरणमा पुगेको मेक्सिको र बलियो टोली जर्मनीलाई पराजित गर्दै सनसनी बनाएको इक्वेडर दुवै उच्च मनोबलका साथ मैदानमा उत्रनेछन्। फिफा विश्वकप २०२६ को राउन्ड अफ ३२ अन्तर्गत बुधबार मेक्सिकोले घरेलु मैदानमा इक्वेडरको सामना गर्दैछ। समूह चरणमा अपराजित रहेको मेक्सिकोले ४० वर्षपछि नकआउट चरणको जितको खोजी गर्नेछ। इक्वेडरका लागि अनुभवी स्ट्राइकर एनेर भ्यालेन्सिया र मिडफिल्डर मोइसेस काइसेडो मुख्य खेलाडीहरू हुनेछन्। १६ असार, काठमाडौं।
फिफा विश्वकप २०२६ को राउन्ड अफ ३२ अन्तर्गतको खेलमा सह–आयोजक मेक्सिकोले घरेलु मैदानमा इक्वेडरको सामना गर्दैछ। मेक्सिको सिटीस्थित एस्टाडियो अज्टेकामा हुने उक्त खेल बुधबार बिहान पौने ७ बजे सुरु हुनेछ। समूह चरणमा शतप्रतिशत जितका साथ नकआउट चरणमा पुगेको मेक्सिको र बलियो टोली जर्मनीलाई हराएर सनसनी मच्चाएको इक्वेडर दुवै उच्च मनोबलका साथ मैदानमा उत्रिनेछन्। मेक्सिकोले समूह चरणमा दक्षिण अफ्रिका, दक्षिण कोरिया र चेक रिपब्लिकलाई पराजित गर्दै ९ अंकसहित समूह ‘ए’ मा शीर्ष स्थान हासिल गरेको थियो।
अर्कोतर्फ, इक्वेडरले समूह चरणको अन्तिम खेलमा जर्मनीलाई २–१ ले पराजित गर्दै उत्कृष्ट तेस्रो टोलीको रूपमा अर्को चरणमा प्रवेश गरेको छ। त्यसअघिका खेलमा इक्वेडर कुरासाओसंग बराबरीमा रोकिएको थियो भने आइभोरी कोस्टसँग पराजित भएको थियो। यो खेलमा दुवै टोलीको रक्षापंक्ति मुख्य आकर्षण हुने छ। मेक्सिकोले समूह चरणका तीनै खेलमा कुनै गोल खाएको छैन भने इक्वेडरले दुई गोल मात्र खाएको छ। मेक्सिको आफ्नो पछिल्लो ११ खेलको अपराजित यात्रामा मात्र २ गोल खाएर निकै अनुशासित र बलियो देखिएको छ। प्रशिक्षक सेबास्टियन बेकासेसेको इक्वेडर टोलीसँग पिएरो इन्कापिए, विल्यान पाचो र मिडफिल्डमा मोइसेस काइसेडो जस्ता विश्वस्तरीय डिफेन्सिभ खेलाडीहरू छन्।
यो टोलीले फिफा विश्वकपको दक्षिण अमेरिकी छनोटका १८ खेलमा केवल ५ गोल मात्र खाएको थियो, जुन सो क्षेत्रकै सबैभन्दा उत्कृष्ट रक्षात्मक रेकर्ड हो। १८ पटक विश्वकप खेलिसकेको मेक्सिको सन् १९७० र १९८६ मा क्वार्टरफाइनलसम्म पुगेको थियो। सन् २०२२ को विश्वकपमा भने टोली समूह चरणबाटै बाहिरिएको थियो। विश्वकपमा मेक्सिकोले सन् १९८६ यता कुनै नकआउट खेल जित्न सकेको छैन। घरेलु मैदानमा ४० वर्ष लामो यो झनझट तोड्ने मेक्सिकोको मुख्य लक्ष्य हुनेछ। पाँचौं पटक विश्वकप खेलिरहेको इक्वेडरका लागि भने सन् २००६ मा नकआउट चरणमा पुग्नु नै अहिलेसम्मको सबैभन्दा ठूलो उपलब्धि हो। पछिल्लो विश्वकपमा समूह चरणबाटै बाहिरिएको इक्वेडर यसपटक मेक्सिकोलाई स्तब्ध पार्दै २० वर्षपछि प्रिक्वार्टरफाइनल नजिक पुग्ने दाउमा छ।
३५ वर्षे अनुभवी स्ट्राइकर राहुल जिमेनेज हाल मेक्सिकोको अग्रपंक्तिको मुख्य हतियार हुन्। हालै पारिवारिक शोकबाट गुज्रिएका राहुलले यो विश्वकपमा उत्कृष्ट पुनरागमन गरेका छन्। उनले दक्षिण अफ्रिकाविरुद्ध उद्घाटन खेलमा गोल गर्दै मेक्सिकोलाई उत्कृष्ट सुरुवात दिलाएका थिए। उनी यस खेलमा पनि इक्वेडरका लागि घातक साबित हुन सक्छन्। त्यस्तै, एसी मिलानबाट व्यावसायिक फुटबल खेल्ने सान्टियागो जिमेनेज पनि मेक्सिकोका प्रमुख विश्वस्त खेलाडी हुन्। उनी मुख्य प्रशिक्षक हाभिएर एगिरेको रणनीति अनुसार खेलको दोस्रो हाफमा मैदान प्रवेश गरी खेलको परिणाम परिवर्तन गर्न सक्ने खेलाडीका रूपमा प्रयोग भइरहेका छन्।
इक्वेडरका लागि इङ्लिस क्लब चेल्सीका स्टार मोइसेस काइसेडो पनि महत्वपूर्ण खेलाडी हुन्। मैदानको मध्यभाग नियन्त्रण गर्ने र विपक्षी आक्रमण रोक्दै आफ्ना स्ट्राइकरहरूलाई बल उपलब्ध गराउने मुख्य जिम्मेवारी उनीले निभाउनेछन्। आक्रमणमा भने एनेर भ्यालेन्सियाले टोलीको नेतृत्व गर्नेछन्। उनी विश्वकप इतिहासमा इक्वेडरका लागि सर्वाधिक ६ गोल गरिसकेका अनुभवी स्ट्राइकर हुन्। ३६ वर्षे यी अनुभवी फरवार्डको अनुभव र गोल गर्ने क्षमता खेलमा निर्णायक बन्न सक्छ। यस खेलको विजेता टोलीले क्वार्टरफाइनल प्रवेशका लागि ‘अन्तिम १६’ मा इङ्ल्यान्ड र डीआर कंगोबीचको विजेतासँग प्रतिस्पर्धा गर्नेछ।
