नेपाल आयल निगमले पेट्रोलियम पदार्थहरूको मूल्यमा ठूलो कटौती गरेको छ। मध्यरातिदेखि लागू हुने गरी पेट्रोलको मूल्य प्रति लिटर २० रुपैयाँ र डिजेलको मूल्य ३० रुपैयाँले घटाइएको छ। खाना पकाउने एलपी ग्यासको मूल्य प्रति सिलिन्डर १०० रुपैयाँले घटाइएको हो।
१६ असार, काठमाडौं। अन्तर्राष्ट्रिय बजारमा इन्धनको मूल्य कम भएपछि निगमले बुधबार (असार १७) राति १२:०१ बजेदेखि नयाँ मूल्य लागू गरेको जनाएको छ। इन्डियन आयल कर्पोरेशनको नयाँ खरिद मूल्य अनुसार पेट्रोल प्रति लिटर १५ रुपैयाँ ९ पैसा, डिजेल २९ रुपैयाँ ४६ पैसा, हवाई इन्धन प्रति लिटर २९ रुपैयाँ ४२ पैसा र एलपी ग्यासको मूल्य पनि घटेको निगमले जनाएको छ।
त्यसैगरी, अन्तर्राष्ट्रिय हवाई इन्धनको काठमाडौंका लागि प्रति किलोलिटर २६५ अमेरिकी डलरले मूल्य घटाइएको छ भने पोखरा र भैरहवाको लागि ब्रेकइभेन बिन्दुमा मूल्य कायम गरिएको निगमले जनाएको छ।
