नेपाल बैंकर्स संघका अध्यक्ष सन्तोष कोइरालाले अर्थतन्त्रलाई सक्रिय राख्न आगामी मौद्रिक नीतिमा लचकता आवश्यक रहेको बताएका छन्। उनले बैंकहरूको औसत प्रतिफल करिब सात प्रतिशतमा सीमित रहेको उल्लेख गर्दै बैंकहरू अत्यधिक नाफामुखी नभएको स्पष्ट पारे। कोइरालाले खराब कर्जा व्यवस्थापन र प्रोभिजनिङ सम्बन्धी व्यवस्था सुधार गर्न तथा एसेट म्यानेजमेन्ट कम्पनी स्थापना प्रक्रिया छिटो अगाडि बढाउन सरकारलाई आग्रह गरे।
कोइरालाले आर्थिक पत्रकार समाजको कार्यक्रममा भने, “बैंकिङ क्षेत्र अत्यन्तै नियमनमा रहेको क्षेत्र हो। हामी करिब ८० खर्ब रुपैयाँ बराबरको निक्षेप व्यवस्थापन गर्दैछौं र करिब ६९ खर्ब रुपैयाँ बराबरको कर्जा पोर्टफोलियो संचालन गरिरहेका छौं।” उनले थपे, “तर वर्तमान आर्थिक परिस्थितिलाई मध्यनजर गर्दै केही नीतिगत लचकता पनि आवश्यक छ।” कोइरालाले नन–पर्फर्मिङ एसेट वर्गीकरण र प्रोभिजनिङ व्यवस्थामा पुनरावलोकनको आवश्यकता औंल्याए।
कोइरालाले ऋणी र बैंक दुवैलाई सहजता प्रदान गर्ने गरी खराब कर्जा सम्बन्धी व्यवस्थामा सुधार गर्न आग्रह गरे। साथै एसेट म्यानेजमेन्ट कम्पनी स्थापना प्रक्रिया छिटो पूरा गर्नुपर्नेमा जोड दिए। सरकारले आगामी पुसभित्र यस्तो कम्पनी स्थापना गर्ने समय सीमा बजेटमार्फत तोकेको उल्लेख गर्दै, यसले समस्याग्रस्त कर्जा व्यवस्थापनमा महत्वपूर्ण सहयोग पुग्ने विश्वास व्यक्त गरे।
सम्बन्धित खबर
