१८ असार, काठमाडौं । रुस र युक्रेनबीच अर्को चरणको युद्धबन्दी साटासाट गर्ने तयारी भइरहेको छ। दुवै पक्षका बन्दीहरूको नामावली प्रमाणीकरण गर्ने प्रक्रिया जारी रहेको रुसकी मानव अधिकार ओम्बुड्सवुमन याना लान्त्रातोभाले जानकारी दिएकी छन्। रुसको दैनिक पत्रिका ‘इज्वेस्तिया’ लाई दिएको अन्तर्वार्तामा लान्त्रातोभाले युद्धबन्दी साटासाटको प्रक्रिया निरन्तर अगाडि बढिरहेको र चाँडै नयाँ चरणको आदानप्रदान हुनेमा आफू आशावादी रहेको बताएकी छन्।
सुरक्षा संवेदनशीलता र अन्तिम नतिजामा असर पर्ने सम्भावनाका कारण साटासाटको निश्चित मिति र विस्तृत विवरणहरू सार्वजनिक गर्न नसकिने उनले स्पष्ट पारिन्। यद्यपि, दुवै देशका अधिकारीहरू बीच नियमित सम्पर्क भइरहेको, नामावलीहरूमा काम भइरहेको र चाँडै यसको सकारात्मक परिणाम आउने विश्वास लान्त्रातोभाले व्यक्त गरेकी छन्। यसअघि, जुन २६ मा रुसी रक्षा मन्त्रालयले युक्रेनको नियन्त्रणमा रहेका १६० जना रुसी सैनिकलाई रिहा गराई स्वदेश फर्काएको थियो। त्यसको बदलामा १६० जना युक्रेनी सैनिकलाई युद्धबन्दीको रूपमा युक्रेनलाई हस्तान्तरण गरिएको रिपोर्ट सार्वजनिक गरिएको थियो।
सम्बन्धित खबर
