फ्रान्स विरुद्ध पाराग्वे: स्टार खेलाडिहरूले भरिएको आश्चर्यचकित पार्ने टोलीको सामना

फ्रान्स र पाराग्वेले अहिलेसम्म विश्वकपमा दुई पटक भिडेका छन् र दुवै खेलमा फ्रान्सले विजयी भएको छ, जहाँ दुवै खेलमा केही महत्वपूर्ण घटनाहरू देखिएका थिए। जायन्ट किलर पाराग्वे र हातमा उपाधि लिने ठूलो प्रतिस्पर्धी फ्रान्सबीचको खेल आइतवार बिहान पौने ३ बजे सुरु हुनेछ। २० असार, काठमाडौं। एकतिर अहिले विश्व फुटबलका स्टार खेलाडिहरूले भरिएको फ्रान्स, अर्कोतिर यस विश्वकपमा आश्चर्यजनक प्रदर्शन गरिरहेको पाराग्वे। यी दुई टोलीहरूले फिफा विश्वकप २०२६ को दोस्रो प्रिक्वार्टरफाइनलमा आमनेसामने हुनेछन् र समग्र ध्यान अहिले यही खेलमा केन्द्रित छ। साविक उपविजेता फ्रान्स र पाराग्वेबीचको भिडन्त आइतबार राति २:४५ बजे अमेरिकाको फिलाडेल्फिया स्टेडियममा हुने छ।

नकआउट चरणमा यस विश्वकपमा सबैभन्दा ठूलो झड्का दिने टोली पाराग्वेले चार पटकको विश्व विजेता जर्मनीलाई पेनाल्टी सुटआउटमा हराएको थियो। फ्रान्सले भने स्वीडेनलाई नियमित समयमै ३-० ले हराएको थियो। यस पटक उपाधि जीत्ने सबैभन्दा ठूलो दावेदार फ्रान्स अहिले उत्कृष्ट लयमा छ। फ्रान्सलाई रोक्नु अहिले कुनै पनि टोलीका लागि चुनौतीपूर्ण भएको छ। सन् २०१८ मा रूसमा सम्पन्न विश्वकपको उपाधि फ्रान्सले जितेको थियो भने सन् २०२२ मा कतारमा पनि फाइनल पुगेर अर्जेन्टिनासँग पेनाल्टी सुटआउटमा पराजित भई उपविजेता बनेको थियो।

पाराग्वेको यात्रा केही उतार-चढावपूर्ण रहेको छ। समूह चरणका तीन खेलमध्ये एक मात्र जितेको पाराग्वे उत्कृष्ट तेस्रो स्थानमा रहँदै नकआउट चरणमा पुगेको थियो। राउण्ड अफ ३२ मा जर्मनीविरुद्ध गुलियो इन्सिसोको गोलले पहिलो हाफमा अग्रता लिएपनि काई हावर्टले दोस्रो हाफमा बराबरी गोल फर्काएपछि निर्धारित समय तथा अतिरिक्त समयमा १-१ को बराबरी रहेको थियो। पेनाल्टी सुटआउटमा जर्मनीलाई ४-३ ले हराउँदै पाराग्वे अन्तिम १६ मा प्रवेश गर्‍यो।

पाराग्वेका प्रशिक्षक गुस्तावो अल्फारोले भनेका छन्, “खेलाडीहरूको लागि यो पहिलो विश्वकप हो। उनीहरूले छिट्टै सिक्नुपर्छ र विश्वकै उत्कृष्ट टोलीसँग खेल्नु ठूलो अवसर हो। दबावविनै खेल्दै इतिहास रच्ने लक्ष्य राखेका छौँ।” यस्तै फ्रान्सका प्रशिक्षक डिडिये डेस्च्याम्प्सले भने, “दक्षिण अमेरिकी टोलीभन्दा फरक छैन, पाराग्वेले पनि शुरूदेखि अन्त्यसम्म कडा संघर्ष गर्नेछ।”