प्रधानमन्त्री वलेन्द्र शाह ‘बालेन’ नेतृत्वको सरकारले आफ्ना सय दिने उपलब्धिहरू शनिबार सार्वजनिक गरेको छ। सरकारले सो अवधिमा शिक्षा, स्वास्थ्य, वैदेशिक रोजगारी, प्रशासनलगायत विभिन्न क्षेत्रहरूमा गरेका कामहरूको विवरण सार्वजनिक गरेको हो। उपलब्धिहरू सार्वजनिक गर्ने क्रममा सरकारका प्रवक्ता एवं शिक्षा, विज्ञान तथा प्रविधि मन्त्री सस्मित पोखरेलले प्रशासनिक सुधार, सार्वजनिक सेवा प्रवाह, सुशासन, पूर्वाधार विकास तथा सामाजिक क्षेत्रलगायतका प्राथमिक क्षेत्रमा सुधारका कार्यक्रम तीव्र गतिमा सञ्चालन भइरहेको बताएका छन्।
मुख्य उपलब्धिहरूमा सम्पत्ति छानबिन आयोगद्वारा प्रशासनिक तथा संस्थागत संरचना तयार गरी हालसम्म ११ हजारभन्दा बढी सम्पत्ति विवरण तथा उजुरी संकलन गरिएको छ। सम्पत्ति शुद्धीकरण अनुसन्धान विभागले सात वटा मुद्दा दायर गरी १०१ जनालाई प्रतिवादी बनाउँदै ११८ अर्बको बिगो माग गरेको छ। सञ्चार तथा सूचना प्रविधि मन्त्रालयले सट्टेबाजी एप र सम्बन्धित वेबसाइट बन्द गर्ने निर्णयअनुसार विभिन्न सेवा प्रदायकबाट दुई लाखभन्दा बढी डोमेन लिङ्क २४ घण्टाभित्र बन्द गराइएका छन्।
निजी सम्पत्तिमा आक्रमण र लुटपाटमा संलग्न १३,६९६ जनालाई नियन्त्रणमा लिएर ६,१९५ वटा मुद्दा दर्ता गरिएको छ। औद्योगिक र व्यावसायिक सुरक्षाका लागि ७७ जिल्लामा द्रुत प्रतिकार्य संयन्त्र स्थापना गरी १५,४३९ सशस्त्र प्रहरी तयार पारिएका छन्। प्रहरीले उद्योग, बैंक तथा सुरक्षा निकायसँग द्रुत सम्पर्क प्रणाली स्थापना गरेको छ।
एकतीस वटा निकाय खारेजी, छ वटा निकाय मर्जर, छ वटा निकाय हस्तान्तरण र अठार वटा निकायको पुनर्संरचना प्रक्रिया अघि बढाइएको छ। पूर्व पदाधिकारी र पहुँचवालाले नियमविपरीत/अवैध रूपमा प्रयोग गर्दै आएका ६७२ वटा सरकारी गाडी र मोटरसाइकल जफत गरी फिर्ता गरिएको छ। त्रिभुवन विश्वविद्यालयका ४ सय जना प्राध्यापक अध्ययन बिदामा गएर फर्कन नसकेको विषयमा कारबाही गरी करिब १३ करोड २६ लाख रुपैयाँ राजस्व फिर्ता गरिएको छ।
