२१ असार, काठमाडौं । नेपाल प्रिमियर लिग (एनपीएल) का पूर्व विजेता लुम्बिनी लायन्सले सन्देश कटुवाललाई प्रमुख कार्यकारी अधिकृत (सीईओ) मा नियुक्त गरेको छ। लुम्बिनी लायन्सका प्रमुख ईश्वर जिसीले आइतबार औपचारिक रूपमा कटुवाललाई स्वागत गर्दै सीईओको जिम्मेवारी सुम्पिएका छन्। गत सिजन लुम्बिनी लायन्सको सीईओ रहेकी भावना घिमिरेलाई यसपटक कार्यकारी निर्देशक (एक्जिक्युटिभ डाइरेक्टर) को जिम्मेवारी दिइएको छ। लुम्बिनीले दोस्रो संस्करणको एनपीएलमा सुदूरपश्चिम रोयल्सलाई फाइनलमा पराजित गर्दै उपाधि जितेको थियो।
नियुक्तिपछि कटुवालले लुम्बिनी लायन्सप्रति आफ्नो कृतज्ञता व्यक्त गर्दै टोलीमा व्यावसायिक र संस्थागत संस्कृतिको विकासमा केन्द्रित हुने बताए। उनले भने, ‘लुम्बिनी लायन्सलाई यो अवसरको लागि धन्यवाद दिन चाहन्छु। विगतमा एनपीएलसँग अनुभव भएकाले आफूले भूमिका अझ प्रभावकारी रूपमा निभाउने विश्वास लिएको छु। व्यवसाय व्यवस्थापन र खेल व्यवस्थापनलाई सँगै अगाडि बढाउँदै कर्पोरेट हाउसमा बलियो टिम कल्चर निर्माण गर्ने मेरो उद्देश्य हुनेछ।’
कटुवाल एनपीएलको पहिलो संस्करणमा काठमाडौं गोर्खाजका सीईओ थिए। पूर्व खेलाडीसमेत रहेका उनीसँग कर्पोरेट तथा व्यवसाय व्यवस्थापन क्षेत्रमा दुई दशकभन्दा बढी अनुभव छ। उनले पूर्वमा कान्तिपुर मिडिया ग्रुपमा बिजनेस हेड, यामाहामा सिनियर म्यानेजर र एपेक्स कलेजमा हेड अफ स्ट्राटेजीको जिम्मेवारी सम्हालिसकेका छन्। नेपाल स्पोर्ट्स म्यानेजमेन्टअन्तर्गत स्थापना गरिएको इन्डोर क्रिकेट तथा फुटबल पूर्वाधार भेलोसिटी एरिनाका उनी एक लगानीकर्ता पनि हुन्। कटुवालको नेतृत्वमा काठमाडौं उपत्यका र बाहिरी जिल्लाहरुमा विभिन्न खेल प्रतियोगिताहरु सफलतापूर्वक सञ्चालन भइसकेका छन्।
