ब्राजिलका ब्रुनो गुमाइरेजले पहिलो हाफको सुरुमै पाएको पेनाल्टी मिस गरेका थिए। २२ असार, काठमाडौं। फिफा विश्वकप २०२६ अन्तर्गत अन्तिम १६ को खेलमा ब्राजिल र नर्वेको खेलको पहिलो हाफ गोलरहित बराबरीमा सम्पन्न भएको छ। अमेरिकाको न्यु योर्क न्यु जर्सी स्टेडियममा भइरहेको खेलमा ब्राजिले पहिलो हाफमा पेनाल्टी गुमाउँदा गोलरहित बराबरीमा अन्त्य भएको हो। ब्राजिलका ब्रुनो गुमाइरेजले पहिलो हाफको सुरुमै पाएको पेनाल्टी प्रहारलाई नर्वेका गोलकिपर ओर्यान नाएल्यन्डले बचाएका थिए। खेलको १४औं मिनेटमा ब्रुनोको पेनाल्टी प्रहार रोकिएको थियो।
नर्वेका क्रिस्टोफर अयरले विपक्षी खेलाडीमाथि पेनाल्टी बक्स भित्र फाल गर्दा रेफ्रीले भिएआरको सहयोगमा ब्राजिललाई पेनाल्टी दिएको थियो। तर ब्रुनो गुमाइरेजको प्रहारलाई नाएल्याण्डले सफलताका साथ रोक्नुभएको थियो। पछिल्लो ४० वर्षमा विश्वकपमा पेनाल्टीमा गोल गर्न असफल हुने ब्रुनो ब्राजिलका प्रथम खेलाडी समेत बन्नुभएको छ। यसअघि सन् १९८६ मा ब्राजिलका जिकोले फ्रान्सविरुद्ध पेनाल्टी मिस गरेका थिए। पहिलो हाफमा नर्वेले धेरै बल पोसेसन राखेको थियो। नर्वेले करिब ६५ प्रतिशत बल पोसेसन सहित ८ सट प्रहार गर्यो, जसमा २ सट टार्गेटमा पुगेका थिए भने ब्राजिलले ४ सट प्रहार गर्यो र तिनमध्ये २ सट टार्गेटमा पुगेका थिए। नर्वेले ब्राजिलसँग अहिलेसम्म खेलेका चार खेलमा अपराजित रहेको छ र सन् १९९८ को विश्वकपमा भएको एकमात्र भेटमा नर्वेले ब्राजिललाई २-१ ले हराएको थियो।
सम्बन्धित खबर
