२२ असार, काठमाडौं । युट्युबले योग्य क्रिएटरहरूका लागि ‘क्यारोजेल पोस्ट’ (एउटै पोस्टमा धेरै तस्बिर स्वाइप गरेर हेर्न मिल्ने फिचर) मा संगीत वा ब्याकग्राउन्ड अडियो थप्न सक्ने नयाँ सुविधा उपलब्ध गराएको छ। कम्पनीले हालै सार्वजनिक गरेको युट्युब स्टुडियोको नयाँ ओभरभ्यू ड्यासबोर्डबारे पनि थप स्पष्टता दिएको छ। मेटाको इन्स्टाग्राम र टिकटकमा पहिलेदेखि नै तस्बिर संग्रहमा संगीत जोड्ने सुविधा निकै लोकप्रिय छ। सोही शैलीलाई पछ्याउँदै युट्युबले गत मे महिनामा घोषणा गरेको यो फिचर अहिले योग्य क्रिएटरहरूका लागि उपलब्ध गराएको हो। अब क्रिएटरहरूले आफ्ना क्यारोजेल पोस्टहरूमा अधिकतम १५ सेकेन्डसम्मको ब्याकग्राउन्ड अडियो थप्न सक्नेछन्। यी पोस्टहरू युट्युबको ‘शर्ट्स फिड’ मा पनि देखिनेछन्।
यसका लागि प्रयोगकर्ताले युट्युबको लाइसेन्स प्राप्त र लोकप्रिय गीतहरूको लाइब्रेरी, युट्युब अडियो लाइब्रेरीमा रहेका हजारौँ रोयल्टी-फ्री ट्र्याकहरू, वा योग्य बजारहरूमा उपलब्ध ‘ड्रिम ट्र्याक’ एआई टुल प्रयोग गरी आफ्नै कस्टम साउन्डट्र्याक छनोट गर्न सक्नेछन्। यो सुविधा पाएका युट्युब क्रिएटरहरूले एउटा पोस्टमा अधिकतम १० वटा फोटो राख्न पाउनेछन्। साथै, स्थिर तस्बिरहरूलाई बढी कथा वा प्रसङ्ग दिन फोटोमाथि ‘टेक्स्ट ओभरले’ सुविधा पनि उपलब्ध छ। युट्युबले आफ्नो नयाँ युट्युब स्टुडियो ट्रान्सपिरेन्सी अपडेटसम्बन्धी थप जानकारी पनि सार्वजनिक गरेको छ। युट्युबका एडिटोरियल हेड रेने रिचीले यस परिमार्जित डिस्प्लेबारे थप स्पष्टता दिएका छन्।
रिचीका अनुसार, अघिल्लो समयमा कपीराइट स्ट्राइक र मोनेटाइजेसन योग्यता जस्ता अत्यन्त महत्त्वपूर्ण जानकारीहरू स्टुडियोका विभिन्न सेक्सनमा छरिएर रहेका थिए, जसले क्रिएटरहरूले च्यानलको अवस्था बुझ्नमा असुविधा अनुभव गर्ने गर्थे। अब ती सबै विवरणहरू एउटै ‘डाइनामिक भ्यू’मा समेटिएका छन्। यसले क्रिएटरहरूलाई आफ्नो च्यानलको स्थिति तुरुन्त हेर्न, योग्यता बुझ्न र कुनै समस्या आएमा तुरुन्त कदम चाल्न सक्षम बनाउँछ। यी अलर्टहरूले क्रिएटरहरूलाई च्यानलको आम्दानी वा मोनेटाइजेसनमा असर पार्न सक्ने सम्भावित समस्याहरू सधैं जानकारी गराउनेछ। रिचीका अनुसार, कुनै भिडियोमा समस्या वा अवरोध आएमा युट्युबले क्रिएटरलाई समाधानका उपाय पनि सिकाउनेछ। उदाहरणका लागि, कुनै भिडियोमा ‘सीमित विज्ञापन आम्दानी’ (लिमिटेड एड अर्निङ) सूचना आएमा क्रिएटरले त्यहाँबाट सिधै अपिल गर्न सक्ने सुविधा पाउनेछन्। क्रिएटरहरूलाई आम्दानीको स्पष्ट विवरण दिन ‘इस्टिमेटेड रेभेन्यु’ नामक कोलम थपिएको छ। युट्युबले गत महिनामा नयाँ स्टुडियो डिस्प्लेको रिडिजाइन घोषणा गरेको थियो र रेने रिचीले यो हप्तादेखि सबै मोबाइल प्रयोगकर्ता तथा क्रिएटरहरूका लागि नयाँ ड्यासबोर्ड रोलआउट भइरहेको पुष्टि गरेका छन्।
