अर्जेन्टिनाका कप्तान लियोनल मेसीले फिफा विश्वकपमा असिस्ट गर्ने क्रममा नयाँ कीर्तिमान स्थापित गरेका छन्। फिफा विश्वकप २०२६ अन्तर्गत इजिप्टसँगको प्रिक्वाटरफाइनल खेलमा असिस्ट गरेपछि मेसीले एकै खेलमा दुई प्रमुख कीर्तिमान कायम गरेका छन्। मेसी सर्वाधिक ९ पटक असिस्ट गर्ने पहिलो फुटबलर बनेका हुन्। यसअघि अर्जेन्टिनाका महान डिएगो म्याराडोनाले ८ असिस्ट गरेका थिए, जुन मेसीले इजिप्टविरुद्धको असिस्टसँगै पार गरेका हुन्।
त्यसैगरी, मेसीले लगातार ६ फरक विश्वकपमा असिस्ट गर्ने पनि इतिहास रचेका छन्। सन् २००६ मा विश्वकपमा पदार्पण गरेका मेसीले त्यसयता ६ वटा विश्वकपमा निरन्तर असिस्ट पुर्याएका छन्। यो विश्वकपमा पहिलो असिस्टमै उनले यी दुई कीर्तिमान तोडेका हुन्। इजिप्टसँगको ३-२ को रोमाञ्चक जितमा मेसीले एक गोल पनि गरे, जसले उनले लगातार खेलहरूमा गोल गर्ने रेकर्ड पनि थप गरेका छन्। उनले यस विश्वकपमा खेलेका सबै ५ खेलमा गोल गरेका छन् र लगातार ९ खेलमा गोल गर्ने एक मात्र खेलाडी बनेका छन्।
मेसी विश्वकपमा सर्वाधिक खेल खेल्ने, सर्वाधिक गोल गर्ने, र सबैभन्दा धेरै विश्वकप भाग लिने खेलाडी हुन्। उनले अहिलेसम्म ६ विश्वकपमा कुल ३१ खेल खेलेका छन्, जसको दोस्रो स्थानमा क्रिस्टियानो रोनाल्डो रहेका छन् जसले २६ खेल खेलेका छन्। मेसी र रोनाल्डो दुवैले मात्र छैटौं विश्वकप खेल्ने कीर्तिमान राखेका छन्। त्यस्तै, मेसीले विश्वकप नकआउट चरणमा सर्वाधिक १४ गोल गरेका जर्मनीका मिरोसलाव क्लोजको रेकर्ड बराबरी गरेका छन् र अब क्वाटरफाइनलमा पुगेका कारण यो कीर्तिमान पनि तोड्नेछन्।
यस विश्वकपमा मेसीले गोल संख्या ८ पुर्याएर सर्वोच्च गोलकर्ता बनेका छन्। प्रतिस्पर्धामा रहेका फ्रान्सका कप्तान किलियन एमबाप्पे र नर्वेका एर्लिङ हालान्डले समान ७-७ गोल गरेका छन्। मेसी दुई फरक विश्वकपमा ७ वा बढी गोल गर्ने पहिलो खेलाडी हुन्। सन् २०२२ मा कतार विश्वकप जित्ने क्रममा उनले ७ गोल गरेका थिए। साथै, मेसीले सबैभन्दा पाका उमेरमा ह्याट्रिक गर्ने, विश्वकपको समूह चरणदेखि सबै चरणमा गोल गर्ने, टिनेजर, बीसका दशक र तीसका दशकका उमेरमा गोल गर्ने, सबैभन्दा धेरै मिनेट विश्वकपमा खेल्ने लगायत एक दर्जनभन्दा बढी कीर्तिमान बनाइसकेका छन्।
