२४ असार, गुल्मी । गुल्मीको रेसुङ्गा नगरपालिका–८ गजुरामा २२ असार बिहान भएको जिप दुर्घटनापछि फरार रहेका चालकलाई पक्राउ गरिएको छ। पक्राउ पर्नेमा रेसुङ्गा नगरपालिका–८ छापटोलका १८ वर्षीय जिप चालक अफिन कामी रहेका छन्। रुपन्देहीको सैनामैना नगरपालिका–१ फेटापारीबाट उनलाई पक्राउ गरिएको गुल्मीका प्रहरी नायब उपरिक्षक (डीएसपी) वीरेन्द्र वीर विश्वकर्माले जानकारी दिनुभयो। उनीमाथि सवारी ज्यान सम्बन्धी कसुरमा थप अनुसन्धान भइरहेको उहाँले बताउनुभयो। उक्त दुर्घटनामा एक जनाको मृत्यु भएको थियो भने तीन जना घाइते भएका थिए।
