रुपन्देहीको युनिभर्सल मेडिकल कलेजमा श्रम कार्यालयद्वारा अनुगमन, १२ बुँदे निर्देशन जारी

२४ असार, काठमाडौं। श्रम तथा रोजगार कार्यालयले रुपन्देहीस्थित युनिभर्सल कलेज अफ मेडिकल साइन्सेसमा विशेष अनुगमन र निरीक्षण गरेको छ। प्रधानमन्त्री तथा मन्त्रिपरिषद्को कार्यालय अन्तर्गत ‘हेलो सरकार’ मा प्राप्त गुनासोका आधारमा श्रम कार्यालयले कलेजमा श्रम ऐन र नियमावली अनुसार श्रमिकलाई प्रदान गर्नुपर्ने सेवा–सुविधाको कार्यान्वयनको अवस्थाबारे सूक्ष्म अनुगमन गरेको जनाएको छ। श्रमिकहरूले श्रम योगदान अनुसार पारिश्रमिक समयमै नपाएको, रोजगारी समाप्त भएको १५ दिनभित्र उपलब्ध गराउनुपर्ने सेवा–सुविधा नपाएको र सरकारले तोकेको न्यूनतम पारिश्रमिक समेत नपाएको भन्दै उजुरी दिएका थिए। उक्त उजुरीको छानबिनका लागि प्रधानमन्त्री कार्यालयको निर्देशनअनुसार बुटवल कार्यालयले कलेजमा स्थलगत निरीक्षण गरेको हो।

अनुगमनपछि श्रम तथा रोजगार कार्यालयले कलेज प्रशासनलाई १२ बुँदे निर्देशन जारी गरेको छ। निर्देशनमा सबै श्रमिकलाई सरकारले तोकेको न्यूनतम पारिश्रमिक र महँगी भत्ता उपलब्ध गराउन, सम्पूर्ण श्रमिकलाई योगदानमा आधारित सामाजिक सुरक्षा कोषमा अनिवार्य रूपमा आबद्ध गराउन र राजीनामा दिएका वा रोजगारी अन्त्य भएका कर्मचारीको तलब तथा सेवा–सुविधा १५ दिनभित्र उपलब्ध गराउन भनिएको छ। कार्यालयले श्रम ऐन विपरीत काममा लगाउने वा कानुनले तोकेका सेवा–सुविधा नदिने रोजगारदातालाई श्रमिकबाट काटिएको रकमको दोब्बरसम्म जरिवाना गरी श्रमिकलाई क्षतिपूर्ति दिनुपर्ने कानुनी व्यवस्था रहेको उल्लेख गर्दै सचेत गराएको छ। कलेजलाई श्रम अडिट सम्पन्न गरी तोकिएको समयमा प्रतिवेदन बुझाउन पनि निर्देशन दिइएको छ। वरिष्ठ श्रम अधिकृत मनोजकुमार शैनी र शाखा अधिकृत हुम पाण्डेसहितको टोलीले कलेजमा अनुगमन गरेको थियो।