अमेरिकी राष्ट्रपति डोनल्ड ट्रम्पले “आज रात फेरि तिनलाई कडा प्रहार गरिनेछ” भनेको केही समयमै अमेरिकी सेनाले इरानविरुद्ध नयाँ चरणका आक्रमणहरू सुरु गरेको छ। इरानी सरकारी सञ्चारमाध्यमहरूले सिरिक र बन्दर अब्बासजस्ता होर्मुज जलमार्गमा अवस्थित बन्दरगाह शहरहरू सहित देशको दक्षिणी भागमा विस्फोटका घटनाहरू भएको जानकारी दिएका छन्। पछिल्ला प्रहारहरू पछि ट्रम्पले सामाजिक सञ्जाल ट्रुथ सोसलमा लेखेका छन्: “हिजो इरानले जहाजहरूमा बम प्रहार गरेकोको जवाफमा यी आक्रमणहरू भएका हुन्। फेरि यस्तो भयो भने स्थिति अझै बिग्रनेछ!” इरानले कुनै आधिकारिक प्रतिक्रिया दिएको छैन तर वरिष्ठ अधिकारीहरूले कुनै पनि अमेरिकी आक्रमणको “तत्काल जबाफ” दिने बताएका छन्।
अमेरिकी सेनाको सेन्ट्रल कमान्डले ती आक्रमणहरू “महत्त्वपूर्ण जलमार्गमा स्वतन्त्र आवागमनमा असर पार्ने तेहरानको क्षमतालाई कमजोर पार्न” गरिएको बताएका छन्। यसअघि अमेरिकी अधिकारीहरूले भनेका छन्: “अन्तर्राष्ट्रिय जलमार्गमा स्वतन्त्र आवतजावत गरिरहेका व्यापारिक जहाज र गैरसैनिक नाविकहरूलाई हालै गरिएको अनुचित आक्रमणमा अमेरिकाले इरानलाई जिम्मेवार ठहराएको छ।” इरानी तट क्षेत्रका कोनाराक र चाबहार जस्ता विभिन्न सहरहरूमा पनि विस्फोट भएका छन्। इरानी सरकारी टेलिभिजनका अनुसार बन्दर अब्बासमा आठ वटा विस्फोट भएका छन् र दुई वटा क्षेप्यास्त्रले दक्षिण इरानस्थित सिरिक र जस्कलाई आक्रमण गरेका छन्।
बुधबार साँझ एयर फोर्स वन विमानमा पत्रकारहरूसँग कुरा गर्दै अमेरिकी राष्ट्रपति ट्रम्पले भने कि इरानले “केही समयअघि सम्पर्क गरेको” र सम्झौता गर्न “बढी इच्छुक” रहेको बताएका छन्। ट्रम्पले भने: “म थाहा छैन उनीहरू सम्झौता गर्न योग्य छन् कि छैनन् – मलाई थाहा छैन कि उनीहरूले सम्झौता पालना गर्छन् कि गर्दैनन्, समस्या त्यहीँ छ।” आक्रमण र प्रत्याक्रमणको सिलसिलामा मंगलबार अमेरिकी सेनाले इरानले होर्मुज जलमार्गमा ट्याङ्करमाथि आक्रमण गरेको आरोप लगाउँदै ‘शक्तिशाली’ प्रहार गरेको थियो। बुधबार इरानले बदलाको रुपमा बाहरेन र कुवेतस्थित अमेरिकी सैन्य अड्डामा आक्रमण गरेको थियो।
