बुधवार प्रतिनिधिसभाको बैठकमा विपक्षी दल नेकपा एमालेका सांसद राजेन्द्रकुमार राईले सभामुख डोलप्रसाद अर्यालप्रति गरेको टिप्पणीले हङ्गामा मच्चाएको छ, जसका कारण १५ मिनेटका लागि सभा स्थगित गर्नुपरेको थियो। उनले सभामुखलाई “कान सुन्नुहुन्छ कि सुन्नुहुन्न” भनेपछि सभामुख अर्यालले उनलाई “मर्यादामा रहेर भनाइ राख्न” आह्वान गरेका थिए। सांसद राईले सभामुखको अवहेलना गरिरहेको भन्दै सभामुख अर्यालले पटकपटक त्यसलाई ‘मर्यादाविपरीत’ भने र पछि उक्त टिप्पणीलाई संसद्को रेकर्डबाट हटाउन निर्देशन दिएको थियो।
यसअघि पनि असार २ गते प्रतिनिधिसभामा अनौठो दृश्य देखिएको थियो। रोस्ट्रममा पुगेका सांसद राई र सभामुख अर्यालबीच करिब पाँच मिनेटसम्म भनाभन भएको थियो। विनियोजन विधेयकमाथिको छलफलमा मन्त्रीहरूको उपस्थिति नभएको भन्दै राईले विषयवस्तुमा प्रवेश गर्न मानेका थिएनन्। बिहीवार बिहान फोनमा कुरा गर्दै सांसद राईले आफूले “भन्न मिल्ने चिज नै भनेको” प्रतिक्रिया दिएका छन्। उनले भने, “मैले केवल हाम्रा नियमावली कार्यान्वयन गर्नुपर्ने र विधिसम्मत सदन चल्नुपर्ने कुरा उठाएकी हुँ।”
सांसद राईले बुधबार गरेको टिप्पणीबारे भने, उनले भाषा मिलाउन खोज्दा माइक काटिएको बताए। उनले भने, “सभामुखज्यू, तपाईँले कान सुन्नुहुन्न कि क्या हो? तमाम लोकले, नागरिक समाजले यसो भन्न खोजिरहेको छ” भन्न खोज्दा माइक काटिएको हो। सभामुख अर्यालका स्वकीय सचिव नवराज पाण्डेले कानको प्रसङ्गमा सभामुखले सांसदलाई गरिमासँग मेल खाने भाषाको प्रयोग गर्न सचेत गराएको बताए।
सांसद राईले सभामुखसँग कुनै पूर्वाग्रह नरहेको भन्दै विगतमा डीपी अर्यालसँग मन्त्रिपरिषद्मा दुई पटक काम गरिसकेको अनुभव सुनाए। उनले भने, “त्यो बेला पनि मैले नियमानुसार नै सम्बन्धित मन्त्रीहरूको उपस्थिति नभईकन कसरी बोल्ने भनेर भनेको थिएँ।” राईको पार्टी नेकपा एमालेका प्रमुख सचेतक ऐन महरले संसदको गरिमा र मर्यादा कायम गर्ने कुरामा गम्भीर रहेको बताउँदै भने, “सबै सांसद तथा सभामुखले यसको गरिमा कायम गर्नु पर्छ।”
सम्बन्धित खबर
