२५ असार, काठमाडौं । नेपाल आयल निगमको रिक्त कार्यकारी निर्देशक पदमा समयमै दरखास्त बुझाउने ६ जना उम्मेदवारहरूको नामावली सार्वजनिक गरिएको छ । उद्योग, वाणिज्य तथा आपूर्ति मन्त्रालयअन्तर्गतको सिफारिस समितिले बिहीबार उम्मेदवारहरूको सूची सार्वजनिक गरेको हो । समितिले १ असारमा निर्णय गरी २ असारमा पदपूर्तिका लागि सूचना प्रकाशित गरेको थियो । २२ असारसम्म आवेदन दिने अन्तिम म्याद तोकिएकोमा सो अवधिमा दरखास्त बुझाउने उम्मेदवारहरूको नाम दर्ता नम्बरको क्रममा सार्वजनिक गरिएको मन्त्रालयले जनाएको छ ।
सार्वजनिक सूचीअनुसार कार्यकारी निर्देशक पदमा प्रतिस्पर्धा गर्ने उम्मेदवारहरूमा प्युठानका छविराज पोख्रेल, प्युठानकै कौशल केसी र सप्तरीका सञ्जीवकुमार देव छन् । त्यस्तै धनुषाका नागेन्द्र साह, महोत्तरीका सरोजकुमार शर्मा र सप्तरीका दीपेन्द्रकुमार देवको नाम पनि उम्मेदवार सूचीमा समावेश छ । सूचीमा रहेका नागेन्द्र साहले यसअघि निगमको निमित्त कार्यकारी निर्देशकको जिम्मेवारी सम्हालेका थिए भने जेठ तेस्रो साता साहले सेवाबाट अवकाश लिएका थिए । चयन प्रक्रियाअन्तर्गत उम्मेदवारहरूले आगामी व्यावसायिक कार्ययोजना प्रस्तुतीकरण र अन्तर्वार्तामा भाग लिनुपर्नेछ । मन्त्रालयले जारी गरेको सूचनामा उल्लेख छ कि कार्ययोजना प्रस्तुतीकरण र अन्तर्वार्ताको मिति तथा स्थान पछि तोकी अर्को सूचना मार्फत जानकारी गराइनेछ ।
