नर्वेका स्टार फर्वार्ड एर्लिङ हालान्डले फिफा विश्वकप २०२६ को क्वार्टरफाइनल खेलअघि सम्पूर्ण दबाब इङ्ल्यान्डमाथि रहेको बताएका छन्। आइतबार हुने खेलमा इतिहास रच्दै पहिलो पटक अन्तिम आठमा पुगेको नर्वेले उपाधि दाबेदार मानिएको इङ्ल्यान्डको सामना गर्नेछ। इङ्ल्यान्डका खेलाडीले हालान्डको अभिव्यक्तिलाई ‘माइन्ड गेम’को रूपमा हेर्दै टोलीको पूर्ण क्षमताप्रति सचेत हुँदैछन्। २६ असार, काठमाडौ।
हालान्डले सञ्चारमाध्यमलाई पनि इङ्ल्यान्डमाथि सकेसम्म धेरै दबाब सिर्जना गर्न आग्रह गरेका छन्। आइतबार बिहान हुने क्वार्टरफाइनल खेलमा नर्वेले इङ्ल्यान्डलाई सामना गर्नेछ। सन् १९९८ पछि पहिलो पटक विश्वकप खेलेको नर्वे यसपटक इतिहास रच्दै पहिलोपटक अन्तिम आठमा पुगेको हो। समूह चरणमा दोस्रो स्थानमा रहँदै नकआउटमा पुगेको नर्वेले त्यसपछि आइभरी कोस्ट र पाँच पटकको विश्व विजेता ब्राजिललाई हराउँदै क्वार्टरफाइनलमा प्रवेश गरेको थियो।
हालान्डले दबाबको विषयमा सोधिएको प्रश्नमा हाँस्दै भने, ‘हो, सम्पूर्ण दबाब इङ्ल्यान्डमाथि छ। उनीहरू नै उपाधि दाबी गर्ने प्रमुख टिमहरू मध्ये एक हुन्।’ उनले थपे, ‘तपाईंहरू सबैले इङ्ल्यान्डका खेलाडीमाथि सकेसम्म धेरै दबाब सिर्जना गर्नुहोस्। उनीहरूको समर्थकहरू पनि टोली क्वार्टरफाइनल पार गर्नेमा विश्वस्त हुनुपर्छ, किनभने त्यो इङ्ल्यान्ड हो।’
हालान्डले यस विश्वकपमा खेलेका चार खेलमा सात गोल गरिसकेका छन्। उनले ब्राजिलविरुद्ध दुई गोल गर्दै टोलीलाई ऐतिहासिक जित दिलाएका छन्। उनले स्वीकार गरे, ‘साँच्चै भन्नुपर्दा, नर्वेसँग विश्वकपको क्वार्टरफाइनल पुग्ने सोच म कहिल्यै गरेको थिइनँ। ब्राजिललाई हराएर अहिले विश्वकपको क्वार्टरफाइनलमा इङ्ल्यान्डसँग खेल्नु हाम्रो लागि अविश्वसनीय अनुभव हो।’
इङ्ल्यान्डका लेफ्ट ब्याक निको ओ’राइलीले हालान्डको अभिव्यक्तिलाई सम्भावित ‘माइन्ड गेम’को संज्ञा दिएका छन्। उनले भने, ‘सायद यो मानसिक खेल हुन सक्छ। तर नर्वे उत्कृष्ट टोली हो, जसले प्रतियोगिताभरि त्यो प्रमाणित गरिसकेको छ। हामी केवल हालान्डबाट होइन, समग्र टोलीबाट सचेत हुनुपर्छ।’ इङ्ल्यान्डका सहायक प्रशिक्षक एन्थोनी ब्यारीले पनि नर्वेलाई केवल हालान्डको टोलीका रूपमा नहेर्न आग्रह गरेका छन्।
