नेपाल पर्यटन बोर्ड र नेपाल पर्वतारोहण संघले पर्वतीय पर्यटन क्षेत्रमा दक्ष जनशक्ति उत्पादन गर्न विशेष तालिम सञ्चालन गर्ने सम्बन्धी सहमति पत्रमा हस्ताक्षर गरेका छन्। दिगो पर्यटन परियोजना अन्तर्गत अपि, मनास्लु र कञ्चनजंघा क्षेत्रमा माउन्टेन गाइड र लिडर तालिम सञ्चालन गरिनेछ। बोर्डका निमित्त कार्यकारी प्रमुख हिक्मतसिंह ऐरले गुणस्तरीय र सुरक्षित पर्वतीय पर्यटनका लागि दक्ष मानव स्रोत निर्माण अपरिहार्य रहेको बताएका छन्। २६ असार काठमाडौं।
नेपालको पर्वतारोहण क्षेत्रका लागि दक्ष जनशक्ति उत्पादन गर्न नेपाल पर्यटन बोर्ड र संयुक्त राष्ट्र संघीय विकास कार्यक्रम (यूएनडीपी) नेपालको संयुक्त पहलमा सञ्चालित दिगो पर्यटन परियोजना (एसटीपी) र नेपाल पर्वतारोहण संघ (एनएमए) बीच विशेष पर्वतारोहण तालिम सञ्चालन गर्ने सहमति पत्रमा हस्ताक्षर भएको छ। सहमतिअनुसार नेपालको पर्वतीय पर्यटन क्षेत्रमा आवश्यक दक्ष तथा व्यावसायिक जनशक्ति उत्पादन गर्न अपि, मनास्लु र कञ्चनजंघा क्षेत्रमा तीन वटा विशेष पर्वतारोहण तालिम सञ्चालन गरिनेछ।
यस अन्तर्गत अपि हिमाल क्षेत्रमा माउन्टेन गाइड समर स्किल (बेसिक माउन्टेनियरिङ ट्रेनिङ), कञ्चनजंघा क्षेत्रमा माउन्टेन गाइड विन्टर स्किल (एडभान्स माउन्टेनियरिङ ट्रेनिङ) तथा मनास्लु क्षेत्रमा माउन्टेन लिडर ट्रेनिङ (समर स्किल) सञ्चालन गरिने छ। पर्यटन बोर्डका निमित्त कार्यकारी प्रमुख तथा एसटीपीका राष्ट्रिय परियोजना निर्देशक हिक्मतसिंह ऐरले पर्वतीय पर्यटन नेपालको सबैभन्दा महत्त्वपूर्ण पहिचान र प्रतिस्पर्धात्मक क्षमता भएको क्षेत्र भएकाले यसको दिगो विकासका लागि दक्ष जनशक्ति निर्माण अपरिहार्य रहेको बताए।
‘गुणस्तरीय, सुरक्षित र दिगो पर्वतीय पर्यटन प्रवर्द्धनका लागि दक्ष मानव स्रोत नै सबैभन्दा ठूलो आधार हो,’ उनले भने, ‘नेपाल पर्वतारोहण संघसँगको यो सहकार्यले अन्तर्राष्ट्रिय मापदण्डअनुसार दक्ष पर्वतारोहण जनशक्ति उत्पादन गर्न सहयोग पुर्याउनेछ र नेपालको पर्वतीय पर्यटनलाई अझ सुरक्षित, व्यावसायिक तथा प्रतिस्पर्धी बनाउन महत्त्वपूर्ण योगदान दिने विश्वास छ।’ सहमति पत्रमा एनएमएका अध्यक्ष फुरगेल्जे शेर्पा, महासचिव राजेन्द्रबहादुर लामा र कोषाध्यक्ष सुमी लामाले हस्ताक्षर गरेका छन्। त्यसैगरि बोर्डका तर्फबाट एसटीपीका राष्ट्रिय परियोजना निर्देशक हिक्मतसिंह ऐर, राष्ट्रिय परियोजना संयोजक खड्गविक्रम शाह र राष्ट्रिय परियोजना प्रबन्धक धर्मराज दवाडीले हस्ताक्षर गरेका छन्।
