काठमाडौँमा आत्मदाहको प्रयास गरेका मुगुका गणेश नेपालीको उपचारका क्रममा निधन भएपछि सडकदेखि संसदसम्म तीव्र आक्रोश फैलिएको छ। शुक्रबार प्रतिनिधिसभा बैठकमा विपक्षी दलका सांसदहरूले सरकारलाई कडा आलोचना गरेका छन्। राष्ट्रिय सभामा प्रधानमन्त्रीले राजीनामा दिनुपर्ने माग पनि उठेको छ। उपचारका क्रममा गणेश नेपालीको मृत्यु भएको खबर बाहिरिएपछि काठमाडौँको माइतीघर क्षेत्रमा केही युवाहरूले प्रदर्शन गरेका छन्। घटनाबारे पाँच सदस्यीय छानबिन समिति गठन गर्ने घोषणा गर्दै गृहमन्त्री सुधन गुरुङले निष्पक्ष छानबिन हुने संसदलाई जानकारी गराएका छन्।
सरकारले निकै प्रयास गर्दा पनि गणेश नेपालीलाई जोगाउन नसकिएकोमा गृहमन्त्री गुरुङले दुःख व्यक्त गरे। “हिजो हामीले अथक प्रयास गर्यौं। प्लेन पनि तयार थियो र अनुमति लिनुपर्ने प्रक्रिया पनि अघि बढाइयो। तर डाक्टरहरूले बिरामीलाई स्थिर अवस्थामा राखेर मात्र स्थानान्तरण गर्न सकिन्छ,” उनले भने। सोधपुछका लागि महानगर प्रहरीका तीन जना कर्मचारीलाई नियन्त्रणमा लिइएको पनि उनले जानकारी गराए।
प्रतिनिधिसभा बैठकमा विपक्षी दलका सांसदहरूले घटनाको जिम्मेवारी सरकारमाथि लगाएका छन्। प्रमुख प्रतिपक्षी नेपाली कांग्रेसकी सांसद बसना थापाले राज्य मूकदर्शक भएको आरोप लगाइन्। “एक युवाले आतङ्कका कारण आगो लगाउँदै गर्दा पनि राज्य मूकदर्शक बनेको छ। शरीर जलेको छ, तर सरकारले एम्बुलेन्स पठाएन र प्रहरी प्रशासन लगाएर अपराधीझैँ व्यवहार गर्यो,” उनले प्रश्न गरे।
गणेश नेपालीको मृत्युको जिम्मेवारी हालको सरकारले लिनुपर्ने भन्दै नेकपा एमालेका सांसद ऐन महरले भने, “यो हत्याको जिम्मेवारी यो बालेन्द्र सरकारले लिनुपर्छ।” ट्राफिक प्रहरीले भने गणेश नेपालीले आत्मदाहको प्रयास गरेको दाबीलाई खारेज गर्दै घटनामा कुनै जरिवाना गरिएको नभएको स्पष्ट पारेको छ। घटनास्थलमा भएको विवादपछि गणेश नेपालीले आत्मदाह गरेको विवरण सार्वजनिक भएको छ।
