चीनमा एक साताभित्रै आएको दोस्रो शक्तिशाली आँधीले आफ्नो मार्गमा पर्ने क्षेत्रबाट करिब २० लाख मानिसहरूलाई सुरक्षित स्थानमा सारिएको छ। टाइफुन बाभी सबैभन्दा फराकिलो ठाउँमा १,००० किलोमिटर फैलिएको छ, जुन लगभग फ्रान्सको चौडाइ बराबर छ। यो आँधी पहिलोपटक शनिवार साँझ ताइझोउ तटीय शहरमा दस्तक दियो र दोस्रो पटक मध्यरातमा वेन्झोउमा प्रभाव पार्यो। निरन्तर रूपमा जापानी टापुहरूमा प्रहार गर्दै यस समुद्री आँधीले ताइवानमा भारी वर्षा गराएको थियो। बाभी ताइवानको उत्तरी भाग हुँदै अगाडि बढिरहेको थियो। यसअघि उक्त आँधीले फिलिपिन्समा गएको पहिरोमा कम्तीमा १७ जनाको मृत्यु गराएको थियो। तर यो आँधी कमजोर हुँदै चरम उष्णदेशीय आँधीमा परिणत भए तापनि यसको वर्षा ‘ब्यान्ड’ भित्र धेरै आर्द्रता भएकाले अझै जोखिमपूर्ण रहने विश्लेषण गरिएको छ।
उत्तर-पश्चिम तर्फ सर्दै जाँदा उक्त समुद्री आँधीको वेग क्रमशः कम हुने अनुमान गरिएको छ। चीनका सरकारी सञ्चारमाध्यमहरूले जानकारी दिएका छन् कि उक्त आँधीको मुख्य भाग आइतबार बिहान जजियाङ प्रान्तको हाङझोउ शहरमा पुगेको छ। मौसम पूर्वानुमानकर्ताहरूले आईतबारको दिन पूर्वी एन्होयबाट र मंगलबार शाङ्दोङ प्रायद्वीपबाट उत्तरी यलो सी तर्फ उक्त आँधीले सर्ने बताएका छन्। सरकारी सञ्चारमाध्यमहरूले उल्लेख गरेका छन् कि जजियाङमा १७ लाखभन्दा बढी मानिस र अन्य नजिकैका प्रान्तहरूमा हजारौं मानिसलाई सुरक्षित स्थानमा सारिएको छ। जजियाङमा विद्यालय, कार्यालय र बाहिरी क्रियाकलापहरू रोकिएका छन् भने ४०० भन्दा बढी विमान उडान र दर्जनौं रेल सेवा रद्द गरिएको छ।
आँधीको पथमा पर्ने करिब एक करोड मानिसहरू बसोबास गर्ने वेन्झोउ शहरमा अधिकारीहरूले लाखौं मानिसलाई सुरक्षित स्थानमा सारिसकेका छन्। “हामी छानाको टायल र रूखका डाँठहरू खस्ने आवाज सुनिरहेका छौं,” सहरका एक बासिन्दा ली लियाङसिङले भने, “हामी ठूलो डरमा छौं।” बेइजिङले जोखिमबाट जोगिन आदेश दिँदै १ लाख मानिसलाई सुरक्षित स्थानमा सार्न भनेको छ, अधिकारीहरूले जानकारी दिएका छन्। ‘सुपर टाइफून’ को रूपमा सुरु भएको बाभी गत सोमबार गुआम र उत्तरी मारियाना टापुहरूमा प्रति घण्टा २९० किलोमिटरको गतिमा ठोक्किएको थियो। यसले प्रशान्त महासागर हुँदै अगाडि बढ्दा हावाको गति प्रति घण्टा १४४ किलोमिटर पुगेको थियो।
ताइवानमा यसको सिधा प्रभाव नरहे तापनि हजारौं मानिसहरूलाई घर छोड्न बाध्य पारिएको र भारी वर्षाले पहिरो खतरा देखा परेको छ। अहिलेसम्म हताहतीको कुनै खबर आएको छैन। ताइवानका अधिकारीहरूले बाभीले १ मिटरसम्म वर्षा गराउन सक्ने चेतावनी दिइसकेका छन्। धेरै उडानहरू रद्द भइसकेका छन् र विद्यालयहरूले यस क्षेत्रमा पठनपाठन बन्द गराइसकेका छन्। स्थानीय बासिन्दाहरूले खाद्यान्न सामग्री घरमा भण्डारण गर्न थालेका छन्, जसका कारण सुपरमार्केटहरू खाली भएका देखिन्छन्। दक्षिणी चीनका केही भागहरू अझै गत हप्ता परेको मेसाक आँधीले गरेको विनाशबाट प्रभावित छन्। मेसाकले निम्त्याएको विपद्मा कम्तीमा ३९ जनाको मृत्यु भएको थियो।
