ठमेल पर्यटन विकास परिषदको अध्यक्षमा राजुमान डङ्गोल ७२८ मत प्राप्त गरी विजयी भएका छन्। निर्वाचनमा महासचिवमा पशुपति कँडेलसहित अन्य पदाधिकारी तथा सदस्यहरू पनि निर्वाचित भएका छन्। नवनिर्वाचित अध्यक्ष डङ्गोलले ठमेललाई सुरक्षित, व्यवस्थित र प्रविधिमैत्री बनाउन ध्यान केन्द्रित गरिने बताए। २८ असार, काठमाडौं।
ठमेल पर्यटन विकास परिषदको शनिबार सम्पन्न ३० तथा ३१औं वार्षिक साधारण सभा तथा आइतबार बिहान सम्पन्न निर्वाचनमा डङ्गोलले प्रतिस्पर्धी प्रश्रय राजभण्डारीलाई पछि पार्दै विजयी भएका हुन्, निर्वाचन अधिकृत हरिप्रसाद पङ्गेनीले जानकारी दिए। अध्यक्ष डङ्गोलले ७२८ मत प्राप्त गरे भने निकटतम प्रतिस्पर्धी राजभण्डारीले ३६५ मत पाए।
त्यसैगरी प्रथम उपाध्यक्षमा राजीव पाण्डे, दोस्रो उपाध्यक्षमा दावाङ (दावा) तामाङ, तेस्रो उपाध्यक्षमा रमेश थापा निर्वाचित भएका छन्। महासचिवमा पशुपति कँडेलले ७२० मत ल्याएर जीत हासिल गर्दा निकटतम प्रतिस्पर्धी पुण्यराम लागेजुले ३३३ मत प्राप्त गरे। सचिवमा दिलिप कँडेल र कोषाध्यक्षमा किन्चु लामु भुटिया (श्रेष्ठ) निर्वाचित भएका छन्, निर्वाचन अधिकृत पङ्गेनीले बताए।
यसैगरी सदस्यमा सुरेन्द्र डङ्गोल, बालकृष्ण खनाल, सानुकाजी महर्जन, रोशन प्रधान (श्रेष्ठ), विश्वमान प्रधान, लिजा मानन्धर, कृष्णबहादुर सेढाईं र चन्द्रा तामाङ निर्वाचित भएका छन्। आगामी दुई वर्षे कार्यकालका लागि सम्पन्न निर्वाचनमा कुल एक हजार ३०९ मतदातामध्ये एक हजार २२५ मत खसेको थियो। निर्वाचनपछि सञ्चारकर्मीसँग कुरा गर्दै नवनिर्वाचित अध्यक्ष डङ्गोलले सुरक्षित र व्यवस्थित ठमेल निर्माणमा आफ्नो ध्यान केन्द्रित हुने बताए। उनले ठमेललाई प्रविधिमैत्री अन्तर्राष्ट्रिय पर्यटक केन्द्रका रूपमा विकास गर्ने योजनामा रहेको पनि जानकारी दिए।
सम्बन्धित खबर
