गत बिहीबार त्रिपुरेश्वरमा गणेश नेपालीले आत्मदाह गरेको घटनाको छानबिनका लागि सरकारले समिति गठन गर्ने निर्णय गरेपछि काठमाडौँ महानगरपालिका (कामपा) ले फील्डमा नगरप्रहरी खटाउने काम रोक्ने निर्णय गरेको कामपाका प्रवक्ताले जानकारी दिएका छन्। नगरप्रहरीले आफ्नो कर्तव्यबाट विमुख नभएको तर सुरक्षा संवेदनशीलतालाई ध्यानमा राखेर आन्तरिक सरसल्लाह भइरहेको कामपाको नगरप्रहरी प्रमुखले बताएका छन्।
बिहीबारदेखि विशेष गरी काठमाडौँको न्यूरोड क्षेत्रमा नगरप्रहरीको अनुपस्थिति हुँदा जथाभावी पार्किङ र सडकपेटीमा अव्यवस्थित बजार बस्न थालेको दृश्य देखिएको छ। आत्मदाहले आत्तिएको महानगर असार २५ गते त्रिपुरेश्वरस्थित राहदानी विभाग अगाडि पार्किङ गरिएको मोटरसाइकल महानगर प्रहरीले ‘ह्वील लक’ गरेको विषयमा विवाद भएपछि मुगुका २५ वर्षीय गणेश नेपालीले आत्मदाह गरेका थिए। उपचार समयमा भोलिपल्ट वीर अस्पतालमा उनको निधन भएको थियो।
घटनापछि उत्पन्न रोष र आक्रोशले नगरप्रहरीहरूलाई प्रभावित बनाएको छ। महानगर प्रहरीले फील्डमा नखटिएको भन्ने विवरण आएका छन्। न्यूरोडमा सडक छेउमै पार्किङ गर्न थालेको र फुटपाथमा अव्यवस्थित बजार बस्न थालेको विषयमा प्रवक्ता नवीन मानन्धरले छानबिन समिति गठन भएकाले तत्कालका लागि फील्डमा जाने काम रोकेको जानकारी दिए।
“छानबिन समिति गठन गर्ने कुरा भएकाले हालका लागि हाम्रो नगरप्रहरी फील्डमा खटिएको अवस्था छैन,” प्रवक्ता मानन्धरले भने। उनले बाँकी काममा नगरप्रहरी खटिएको भएपनि पार्किङ र फुटपाथ व्यवस्थापनमा नेपाल प्रहरीसँग स्पष्ट कार्यविभाजन खोजिरहेको बताए। काठमाडौँ महानगरपालिकाका नगरप्रहरी प्रमुख विष्णुप्रसाद जोशीले भने आफूहरूको कर्तव्यबाट विमुख हुन नचाहेको र केही ठाउँमा भने खटिन नरोकेको बताए।
