फिफा विश्वकप २०२६ को अन्तिम ३२ बाट बाहिरिएपछि सेनेगलले मुख्य प्रशिक्षक पापे थियाउलाई बर्खास्त गरेको छ। सेनेगल फुटबल महासङ्घले राष्ट्रिय टोलीको प्रदर्शनको मूल्यांकन गर्दै थियाउ र उनको प्राविधिक टोलीको जिम्मेवारी अन्त्य गर्ने निर्णय गरेको हो। अन्तिम ३२ को खेलमा बेल्जियमविरुद्ध दुई गोलको अग्रता कायम गर्न नसक्दा सेनेगल ३–२ ले पराजित हुँदै विश्वकपबाट बाहिरिएको थियो।
सेनेगल फुटबल महासङ्घ (एफएसएफ) ले शनिबार बसेको कार्यसमितिको बैठकपछि थियाउ र उनको सम्पूर्ण प्राविधिक टोलीको जिम्मेवारी अन्त्य गर्ने प्रक्रिया अघि बढाएको जनाएको छ। महासङ्घले जारी गरेको विज्ञप्तिमा राष्ट्रिय टोलीको प्रदर्शन र भविष्यको सम्भावनाको विस्तृत मूल्यांकनपछि सेनेगली फुटबलको हितलाई ध्यानमा राख्दै यस्तो निर्णय गरिएको उल्लेख छ।
थियाउ डिसेम्बर २०२४ देखि सेनेगलको मुख्य प्रशिक्षक थिए। विश्वकपको समूह चरणमा सेनेगलले फ्रान्स र नर्वेसँग लगातार हार बेहोरे पनि इरानलाई ५–० ले पराजित गर्दै उत्कृष्ट तेस्रो स्थानमा रहेर नकआउट चरणमा पुगेको थियो। अन्तिम ३२ मा बेल्जियमविरुद्ध सेनेगल ८५औं मिनेटसम्म २–० ले अगाडि थियो। तर अन्तिम पाँच मिनेटमा दुई गोल खाएपछि खेल अतिरिक्त समयमा पुगेको थियो। अतिरिक्त समयको अन्त्यतिर युरी टिलेमान्सले पेनाल्टीमा गोल गरेपछि सेनेगल ३–२ ले पराजित हुँदै प्रतियोगिताबाट बाहिरिएको थियो।
विश्वकपबाट निराशाजनक बहिर्गमन पछि सेनेगल फुटबल महासङ्घले प्रशिक्षक परिवर्तन गर्ने निर्णय गरेको हो। अब महासङ्घले नयाँ मुख्य प्रशिक्षक नियुक्त गर्ने प्रक्रिया अघि बढाउने अपेक्षा गरिएको छ।
सम्बन्धित खबर
