दक्षिण अफ्रिकाका २५ वर्षका मिडफिल्डर जेडन एडम्स आफ्नै घरमा मृत फेला परेपछि प्रहरीले छानबिन सुरु गरेको छ। दक्षिण अफ्रिकी फुटबल खेलाडी संघले शनिबार उनको निधनको पुष्टि गरेको भए पनि मृत्युको आधिकारिक कारण अहिलेसम्म सार्वजनिक भएको छैन। विश्वकप खेलेर फर्किएका एडम्सले दक्षिण अफ्रिकाका लागि तीन खेल खेलेका थिए।
३० असार, काठमाडौं। दक्षिण अफ्रिकी फुटबल खेलाडी जेडन एडम्सको मृत्युको विषयमा प्रहरीले छानबिन सुरु गरेको छ। फिफा विश्वकप खेलेर फर्किएको केही समयमै उनको शव फेला परेको थियो। उक्त घटनाको प्रहरीले अनुसन्धान शुरु गरेको हो। दक्षिण अफ्रिकी राष्ट्रिय टोलीका २५ वर्षीय मिडफिल्डर एडम्स केप टाउनको स्कट्स क्लुफ् भनिने क्षेत्रमा रहेको एउटा घरमा मृत अवस्थामा फेला परेका थिए।
दक्षिण अफ्रिकी फुटबल खेलाडी संघले शनिबार उनको निधन पुष्टि गर्यो। तर उनको मृत्युको कारण अहिलेसम्म खुलाइएको छैन। विश्वकपमा चेक रिपब्लिकविरुद्ध १–१ को बराबरी खेल्नुभन्दा एक दिन अघि मात्र उनका हजुरआमा मरियानाको निधन भएको थियो। यद्यपि एडम्सले दक्षिण अफ्रिकाका लागि खेलेका तीन खेलमध्ये दुई खेल सुरुवाती ११ मा परेर खेलेका थिए। उनले चेक रिपब्लिकविरुद्धको खेल र दक्षिण अफ्रिकाले मेक्सिकोसँग २–० ले पराजित भएको खेलमा सुरुवाती ११ मा रहेर खेलेका थिए। त्यस्तै दक्षिण कोरियाविरुद्धको १–० को जितमा भने उनी विकल्पी खेलाडीका रूपमा मैदान प्रवेश गरेका थिए। जुन २८ मा कानडासँग पराजित हुँदै दक्षिण अफ्रिका विश्वकपबाट बाहिरिएको खेलमा भने उनी मैदान प्रवेश नगरी बेन्चमै सीमित थिए।
