संयुक्त राज्य अमेरिकाको न्यूयोर्क न्यूजर्सी स्टेडियममा आइतबार आयोजना हुने फिफा विश्वकप २०२६ को फाइनल खेलमा हाफटाइम विश्राम २० देखि २५ मिनेटसम्म रहने अपेक्षा गरिएको छ। त्यो विश्राम अवधिमा मडोना र के-पप ब्यान्ड बीटीएसका प्रमुख कलाकारको प्रस्तुति रहेको ११ मिनेट लामो ‘सुपर बोल’ शैलीको कार्यक्रम पनि समावेश हुनेछ। प्रतियोगिता आयोजक फिफाका स्रोतहरूले विश्राम करिब २० मिनेटसम्म हुने बताएका छन्। तथापि, परम्परागत १५ मिनेट हाफटाइम ब्रेक पछि आयोजना हुने ११ मिनेट लामो सङ्गीत कार्यक्रमका कारण हाफटाइमको अवधी केही बढ्ने अनुमान गरिन्छ।
आईफ्याब अर्थात् अन्तर्राष्ट्रिय फुटबल सङ्घ बोर्ड खेल नियमहरू निर्धारण गर्ने निकाय हो। नियमअनुसार खेलाडीहरूले “१५ मिनेटभन्दा बढी नहुने गरी” हाफटाइम विश्राम पाउनु पर्छ। गत मंगलबार ड्यालसमा सम्पन्न पहिलो सेमिफाइनलमा स्पेनले फ्रान्सलाई २-० ले पराजित गर्दै फाइनलमा आफ्नो स्थान सुनिश्चित गरिसकेको छ। अब एटलान्टामा बुधबार साँझ ८ बजे बीएसटी समयानुसार इङ्ल्यान्ड र अर्जेन्टिनाबीच दोस्रो सेमिफाइनल खेल हुनेछ। यो खेलको विजेता स्पेनसँग विश्वकपको उपाधि हात पार्न प्रतिस्पर्धा गर्नेछ।
फिफाद्वारा आयोजना गरिएको र न्यूजर्सीमा सम्पन्न गत वर्षको क्लब विश्वकप फाइनलको हाफटाइममा कोल्डप्ले, जे बाल्भिन, डोजा क्याट, टेम्स र इम्यानुएल केलीले संयुक्त रूपमा सङ्गीत प्रस्तुति दिएका थिए। त्यो विश्राम लामो भएको कारण खेलको दोस्रो हाफ २४ मिनेटपछि सुरू भएको थियो। आउँदो आइतबार हुने संगीत कार्यक्रममा प्रस्तुत गर्ने कलाकारहरूको सूचीमा गत हप्ता जस्टिन बीबरलाई पनि थपिएको छ। त्यस कार्यक्रममा बर्न बोइ, गुस्ताभो दुदामेल, र कोल्डप्लेको उपस्थिति रहेको ‘पीएस२२ कोरस’ समेत समावेश गरिएको छ। उक्त शो गायक क्रिस मार्टिनले ‘क्यूरेट’ गरेका छन्। विश्वकप फाइनल स्थानीय समय अनुसार १५:०० बजे (२०:०० बीएसटी) सुरू हुनेछ। समापन समारोह स्थानीय समय अनुसार १३:३० बजे (१८:३० बीएसटी) सुरू हुनेछ। समारोहमा टम क्रूज, लाउरा पाउसिनी, निकोल शेर्जिङ्गर, रोबी विलियम्स र आईशोस्पीडले प्रस्तुति दिनेछन् भने जेनिफर हडसनले संयुक्त राज्य अमेरिकाको राष्ट्रिय गीत गाउने छन्।
