पर्सा जिल्लाको ठोरी गाउँपालिकामा नेपाल टेलिकमको नेटवर्क प्रभावकारी नहुनुले स्थानीयवासीहरू बैंकिङ र सरकारी सेवामा अवरोध भोगिरहेका छन्। बिजुली कट्नासाथ टेलिकम टावरहरू काम नगर्दा आपतकालीन एम्बुलेन्स सेवा र बाढी सम्बन्धी सूचना प्राप्त गर्नसमेत समस्या देखिएको छ। सङ्घीय सञ्चार मन्त्रालय र दूरसञ्चार प्राधिकरणलाई पटक-पटक समस्याबारे जानकारी गराए पनि टावरहरूमा ब्याकअप सुविधा नहुँदा समस्या समाधान हुन सकेको छैन।
ठोरी गाउँपालिकामा नेपाल टेलिकमको सेवा प्रभावकारी नहुँदा सर्वसाधारणले ठूलो झन्झट भोग्नुपरेको छ। हावाहुरी वा वर्षाका बेला बिजुली कट्दा टेलिकम नेटवर्क क्रियाशील हुन नसक्दा स्थानीयवासी त्रसित भएका छन्। यहाँका स्थानीय चिरञ्जिवी सापकोटाका अनुसार टावरहरूमा पर्याप्त ब्याकअप व्यवस्था नभएकाले समस्या उत्पन्न भएको हो।
ठोरी, ब्रह्मनगर, विजयबस्ती र सुवर्णपुरजस्ता चार स्थानमा टेलिकमले टावर स्थापना गरेको भए पनि ब्याकअप अभावका कारण नेटवर्क समस्या रहिरहेको छ भनी अर्को स्थानीय अमृत श्रेष्ठले बताए। टेलिकमको नेटवर्कमा समस्या हुँदा बैंकिङ कारोबार, अनलाइन भुक्तानी, शैक्षिक क्रियाकलाप तथा सरकारी कामकाज प्रभावित हुने गरेका छन्। वर्षाका बेला हुने बाढी र डुबान जोखिमसम्बन्धी सूचना प्रहरीलाई दिने र आवश्यक परे आपतकालीन एम्बुलेन्स बोलाउनसमेत समस्या भइरहेको छ। स्थानीयहरूले नेपाल टेलिकम, दूरसञ्चार प्राधिकरण र सञ्चार मन्त्रालयलाई यो समस्याबारे पटक-पटक लेखित र मौखिक रूपमा जानकारी गराए पनि सुनुवाइ नहुँदा उनीहरू असन्तुष्ट छन्।
