लुम्बिनी प्रादेशिक अस्पतालमा सुशासन र सेवा सुधारको लागि २४ बुँदे ज्ञापनपत्र बुझाइयो
नेपाल कम्युनिष्ट पार्टी माओवादी रुपन्देहीले लुम्बिनी प्रादेशिक अस्पतालमा सुशासन र सेवा सुधारका लागि २४ बुँदे ज्ञापनपत्र बुझाएको छ। जिल्ला सेक्रेटरी बिरेन्द्र सीले नागरिकहरूले सहज, गुणस्तरीय र सम्मानजनक स्वास्थ्य सेवा पाउनुपर्ने भन्दै अस्पताल प्रशासनलाई सचेत गराएका छन्। ज्ञापनपत्रमा ओपिडी सेवा प्रविधिमैत्री बनाउन क्यूआर भुक्तानी, डिजिटल टोकन र अनलाइन पूर्वदर्ता प्रणाली लागू गर्नुपर्ने माग गरिएको छ। ३१ असार, बुटवल।
नेपाल कम्युनिष्ट पार्टी (माओवादी) रुपन्देहीले लुम्बिनी प्रादेशिक अस्पतालमा सुशासन र सेवा प्रवाहसम्बन्धी समस्याहरू तत्काल समाधानका लागि अस्पताल प्रशासनलाई २४ बुँदे ज्ञापनपत्र बुझाएको छ। पार्टीका जिल्ला सेक्रेटरी बिरेन्द्र सीले अस्पतालका मेडिकल सुपरिन्टेण्डेन्टलाई सम्बोधन गर्दै स्वास्थ्य सेवा संविधानले प्रत्याभूत गरेको मौलिक अधिकार भएकाले सरकारी अस्पतालबाट सेवा लिन आउने प्रत्येक नागरिकले सहज, छिटो, गुणस्तरीय र सम्मानजनक उपचार पाउने सुनिश्चित गर्नुपर्ने दाबी गरेका छन्।
लुम्बिनी प्रदेश लगायत छिमेकी जिल्लाका हजारौं नागरिकको उपचार केन्द्र भएको अस्पतालमा सेवाग्राहीबाट निरन्तर गुनासाहरू प्राप्त भइरहेका छन्। स्थलगत निरीक्षणमा पनि सेवा प्रवाहमा कमजोरी देखिएकोले सुधारका लागि २४ बुँदे माग अघि सारिएको सेक्रेटरी बिरेन्द्र सीले बताएका छन्। ज्ञापनपत्रमा अस्पतालको ओपिडी सेवा पूर्णरूपमा प्रविधिमैत्री बनाउनुपर्ने उल्लेख गरिएको छ। टिकट वितरण प्रणालीलाई व्यवस्थित गर्दै क्यूआर कोड मार्फत शुल्क भुक्तानी, डिजिटल टोकन प्रणाली, अनलाइन पूर्वदर्ता र एसएमएस मार्फत पालो जानकारी दिने प्रणाली लागू गर्नुपर्ने माग गरिएको छ।
