अन्तर्राष्ट्रिय क्रिकेट परिषद् (आईसीसी) ले एकदिवसीय विश्वकप प्रतियोगितामा व्यापक संरचनात्मक परिवर्तन गरेको छ। नयाँ संरचनाअनुसार विश्वकपमा १४ टोलीको सहभागिता हुने र प्रतियोगिता तीन चरणमा सञ्चालन गरिनेछ। आईसीसीले प्रतिस्पर्धा अझ कडा र रोमाञ्चक बनाउन यो नयाँ संरचना लागू गरिएको जनाएको छ।
नयाँ संरचनाअनुसार, विश्वकपमा सहभागी १४ टोलीमध्ये वरीयताअनुसार १२औं, १३औं र १४औं स्थानमा रहेका टोलीबीच ‘सुपर सिरिज’ हुनेछ। राउन्ड रोबिन ढाँचामा हुने यस चरणमा विजेता टोली मात्र १२औं टोलीको रूपमा मुख्य समूह चरणमा प्रवेश गर्नेछ। दोस्रो चरणमा १२ टोलीलाई दुई समूहमा विभाजन गरिनेछ। प्रत्येक समूहमा ६–६ टोली रहनेछन् र दुवै समूहका शीर्ष तीन–तीन टोलीसँगै समग्रमा उत्कृष्ट अर्को टोली चयन गरी ‘सुपर ७’ चरणमा प्रवेश गराइने योजना छ।
‘सुपर ७’ चरणमा सातै टोलीले एकअर्काविरुद्ध राउन्ड रोबिन खेल्नेछन्। यस चरणको शीर्ष चार टोलीले सेमिफाइनलमा स्थान बनाउनेछन्। सेमिफाइनलमा पहिलो स्थानको टोलीले चौथो स्थानको टोलीसँग र दोस्रो स्थानको टोलीले तेस्रो स्थानको टोलीसँग प्रतिस्पर्धा गर्नेछ। त्यसपछि विजेता टोलीहरूले फाइनल खेल्नेछन्। यसअघि विश्वकपमा १४ टोलीलाई दुई समूहमा विभाजन गरी शीर्ष तीन–तीन टोलीले ‘सुपर सिक्स’ चरणमा प्रवेश गर्थे।
आईसीसीका अनुसार नयाँ संरचनाले प्रतियोगिताको सुरुवाती चरणदेखि प्रत्येक खेलको महत्व वृद्धि गर्ने, प्रतिस्पर्धालाई कडा बनाउने र विश्वकपलाई खेलाडी र समर्थकका लागि अझ रोमाञ्चक बनाउने उद्देश्य राखेको छ।
सम्बन्धित खबर
